مەجٸلٸس دەپۋتاتى باقىتجان بازاربەك تسيفرلاندىرۋ ارقىلى مەملەكەتتٸك قىزمەتكەرلەردٸڭ سانىن قىسقارتۋ كەرەك ەكەنٸن ايتتى, دەپ حابارلايدى Dalanews.kz.
دەپۋتاتتىڭ پٸكٸرٸنشە, بٷگٸن ٷنەمدەپ, قىسقارتپاساق, ەرتەڭ قارىز قىسا تٷسەدٸ.
"جاساندى ينتەللەكت اياسىندا, مەملەكەتتٸك قىزمەت - بەرٸن تسيفرلاندىرۋ اياسىندا بٸرتٸندەپ-بٸرتٸندەپ, 2026 جىلدان باستاپ تولىعىمەن مەملەكەتتٸك اپپاراتتى قىسقارتۋىمىز كەرەك. ودان بارلىعى قورقادى, ٷكٸمەت تە قورقادى. 2026 جىلدان باستاپ مەملەكەتتٸڭ شىعىندارىن قىسقارتپاساق, ٷلكەن قارىزىمىز ەرتەڭ بٸزدٸ قىسىپ وتىرادى. سوندىقتان بٸرتٸندەپ "سامۇرىق-قازىنا" ۇلتتىق ەل-اۋقات قورى", ودان كەيٸن بەيتەرەك ۇلتتىق كومپانييالارىنىڭ ەكٸمشٸلٸك اپپاراتىن قىسقارتۋىمىز كەرەك", - دەدٸ ول.
باقىتجان بازاربەك بۇل پروتسەسستە مينيسترلٸكتەر دە شەت قالماۋ كەرەك ەكەنٸن جەتكٸزدٸ.
"مينيسترلٸكتەردٸ دەرەۋ قىسقارتۋىمىز كەرەك. ەكٸ-ٷش مينيسترلٸكتٸ بٸرٸكتٸرۋ كەرەك. كٸشكەنتاي عانا سانى بار قازاقستان رەسپۋبليكاسىنا وسىنشاما مينيسترلٸك قاجەت ەمەس. مىسالى سۋ مينيسترلٸگٸ مەن ەكولوگييا مينيسترلٸگٸن قوسا سالۋعا بولادى. قارجى مينيسترلٸگٸ مەن ۇلتتىق ەكونوميكا مينيسترلٸگٸن قوسا سالۋعا بولادى. يندۋسترييا مينيسترلٸگٸ مەن ٶنەركەسٸپ, كٶلٸك مينيسترلٸگٸن قوسا سالۋعا بولادى. ەربٸر مينيستردٸڭ كەمٸندە بەس-التى ورىنباسارى بار. ول ورىنباسارلاردىڭ سانىن كەمٸندە ەكەۋ قالدىرۋ كەرەك, تٶرت ورىنباساردى قىسقارتۋ قاجەت. باسقاشا ايتقاندا, شىعىندى ازايتۋىمىز كەرەك", - دەدٸ دەپۋتات.
