ايتا كەتسەك، بۇگىنگى ۇكىمەت جيىنىندا پرەمەر-مينيستر ولجاس بەكتەنوۆ قارجى ءمينيسترىنىڭ دەكلاراسيالاۋدىڭ ءتورتىنشى كەزەڭىندە قامتىلاتىن جەكە تۇلعالاردىڭ 90%-ىن دەكلاراسيالاۋدان بوساتۋ تۋرالى ۇسىنىسىن قولدادى. ال بۇل 8 ميلليونعا جۋىق ادام دەكلاراسيا تاپسىرۋدان بوساتىلادى دەگەن ءسوز. ال قالعان 10% دەگەن كىمدەر؟ بۇل ساۋال جاۋابىن Dalanews.kz سايتىنان وقىپ-بىلە وتىرىڭىزدار.
قارجى مينيسترلىگىنىڭ مالىمەتىنشە، دەكلاراسيالاۋ مىنا ساناتتاعى تۇلعالار ءۇشىن ءوز كۇشىن ساقتايدى:
- قازاقستان رەسپۋبليكاسىنان تىس جەرلەردە اكتيۆتەرى بار،
- ءبىر جىل ىشىندە قۇنى 20 000 اەك (2024 جىلى 1 اەك - 3692، دەمەك 738 400 000 تەڭگەدەن) استام سوماعا ساتىپ الۋلار جاساعان،
- سالىق تولەپ، ءوز بەتىنشە تابىس تاپقاندار
"بۇدان باسقا، ازاماتتارعا ەرىكتى تۇردە دەكلاراسيالاۋ قۇقىعى بەرىلەدى"، — دەپ اتاپ ءوتتى بۇگىنگى جيىندا قارجى ءمينيسترى.
قۇزىرلى ۆەدومستۆو مالىمەتىنشە، جالپى جۇيەدە 4،8 ملن قازاقستاندىق تىركەلگەن. 2024 جىلى دەكلاراسيا ۇسىنباعان نەمەسە سالىق كەزەڭىن ۇسىنباعان نە قاتە كورسەتكەن ازاماتتار 281 مىڭ حابارلاما الدى. ولاردىڭ بەستەن ءبىر بولىگى ورىندالدى.
ايتا كەتسەك، 14 قاراشادا قازاقستاندا جالپىعا بىردەي دەكلاراسيالاۋدىڭ III جانە IV كەزەڭدەرىنىڭ كۇشىن جويۋ تۋرالى پەتيسيا جاريالاندى. وندا تابىسىنىڭ جارتىسىنان كوبى تەك ىشەر اسىنا كەتەتىن قارا حالىقتى بوس اۋرەگە سالماي، دەكلاراسيالاۋدان بوساتۋ سۇرالعان ەدى.
