داريعا نازاربايەۆانىڭ استانانىڭ ورتالىعىنداعى رەزيدەنسيالارىنىڭ ءبىرى سۇرىلەدى. بۇل تۋرالى "ۆىحود ك موريۋ" ارناسى جازدى، - دەپ حابارلايدى Dalanews.kz.
دەرەككوز مالىمەتىنشە، ەلوردادا ەسىل وزەنىنىڭ جاعاسىندا نۇرسۇلتان نازاربايەۆتىڭ تۇڭعىشى داريعا نازاربايەۆانىڭ بۇرىنعى رەزيدەنسياسى سۇرىلەتىن بولدى. جۇمىستار تەك رەزيدەنسيا اۋماعىندا ەمەس، داريعا نازاربايەۆا يەلىك ەتكەن ىرگەلەس ۋچاسكەلەردە دە جۇرگىزىلىپ جاتىر. جۇمىستىڭ جالپى اۋدانى 30 مىڭ م2 بولادى.
ارنا بۇل جەر ەليتالىق تۇرعىن ءۇي كەشەنىن سالۋ ءۇشىن تازارتىلعان بولۋى مۇمكىن دەپ توپشىلادى.
"اڭگىمە ەسىلدىڭ وڭ جاعالاۋىنداعى، اتاتۇرىك ساياباعى مەن اق بۇلاق وزەنىنىڭ اراسىنداعى اۋماق تۋرالى. داريعا نازاربايەۆانىڭ رەزيدەنسياسىنىڭ اۋدانى 15 مىڭ م2 بولادى، ەكى وزەننىڭ تۇيىسكەن جەرىندە ورنالاسقان. ءبىر كەزدەرى بىرەۋى ءىىم ساناتورييىنە تيەسىلى بولعان ەكى كورشىلەس ۋچاسكەمەن بىرگە بۇكىل كەشەننىڭ اۋدانى - 300 سوتىق. بيىل جازعا دەيىن داريعا نازاربايەۆا وسى اۋماقتىڭ بارلىعىنا يەلىك ەتتى"، - دەپ جازىلعان دەرەككوز مالىمەتىندە.
ارنا اقپاراتىنا سۇيەنسەك، بۇل جىلجىمايتىن مۇلىك 2000 جىلى جەلتوقساندا قۇرىلعان "ترانساكسيا" جشس-نە جازىلعان، ال نازاربايەۆتىڭ تۇڭعىشى بۇل كومپانياعا 2020 جىلعى قاراشادان 2021 جىلعى قىركۇيەككە دەيىن يەلىك ەتكەن، كەيىن كومپانيانىڭ يەلەرى تۋرالى مالىمەتتەر جاسىرىلعان.
سۋرەتتەرگە قاراعاندا، ءقازىر نۇرسۇلتان نازاربايەۆتىڭ قىزىنىڭ بۇرىنعى رەزيدەنسياسىنىڭ اۋماعىندا قارقىندى قۇرىلىس جۇمىستارى جۇرگىزىلىپ جاتىر: بارلىق عيمارات (سونىڭ ىشىندە بۇرىنعى ساناتوريي) بۇزىلعان، جاسىل جەلەكتەردەن ەشتەڭە قالماعان. دەگەنمەن ازىرگە نازاربايەۆانىڭ بۇرىنعى سارايى مەن بىرنەشە عيماراتتار "ساۋ"، دەرەككوز ولار دا جاقىن ارادا بۇزىلاتىنىن جازدى.
"بۇل اكتيۆتىڭ قۇنىن شامامەن باعالاۋعا بولادى. جاقىن ماڭدا، وزەن جاعاسىندا ساتۋعا شىعارىلعان وسىعان ۇقساس ۋچاسكەلەر جوق. عيماراتتاردى ەسكەرە وتىرىپ، نازاربايەۆانىڭ اكتيۆىن تومەنگى شەك بويىنشا 7-8 ملرد تەڭگەگە باعالاۋعا بولادى"، - دەپ جازىلعان دەرەەكتە.
ايتا كەتەيىك، بيىل جازدا استاناداعى "دۋمان" ءقوناقۇي كەشەنى دە ساتىلىمعا شىعارىلدى. بۇعان دەيىن ول دا داريعا نازاربايەۆا مەن ونىڭ "جۇبايى" دەلىنەتىن قايرات شارىپبايەۆقا تيەسىلى بولعان.
