پارلامەنت سەناتىنىڭ ءتوراعاسى داريعا نازاربايەۆا پارلامەنت پالاتالارىندا زاڭ جوبالارىنىڭ قارالۋ كەستەسى بويىنشا كەڭەس وتكىزدى. شاراعا ءماجىلىس باسشىلىعىنىڭ وكىلدەرى، سەنات بيۋروسىنىڭ مۇشەلەرى، ادىلەت ءمينيسترى، پرەزيدەنت اكىمشىلىگى باسشىلىعىنىڭ، پرەمەر-مينيستر كەڭسەسىنىڭ وكىلدەرى، سونداي-اق پارلامەنت پالاتالارى اپپاراتتارىنىڭ باسشىلارى قاتىستى، دەپ حابارلايدى Dalanews.kz ق ر پارلامەنتى سەناتىنىڭ باسپا ءسوز قىزمەتىنە سىلتەمە جاساپ.
داريعا نازاربايەۆا كىرىسپە سوزىندە زاڭ شىعارۋ پروسەسىنىڭ جالپى جاقسارىپ كەلە جاتقانىنا قاراماستان، ۇيىمداستىرۋ ماسەلەلەرىن قاراۋ بارىسىندا ءبىرقاتار شەشىلمەگەن ماسەلەلەر بار ەكەنىن اتاپ ءوتتى.
"ءبىزدىڭ باستى مىندەتىمىزدى ورىنداۋعا – ساپالى زاڭداردى قابىلداۋعا كەدەرگى كەلتىرەتىن جۇيەدەگى اقاۋلاردى ءبىلۋ ءۇشىن بارلىق تاراپتاردى تىڭداۋ كەرەك"، - دەپ اتاپ ءوتتى ول.
زاڭ جوبالارىنىڭ 90 پايىزى ۇكىمەتتىڭ باستاماسىمەن ازىرلەنەتىنىن اتاپ وتكەن ءجون. زاڭ جوبالارى جۇمىستارىنىڭ جوسپارى جىل سايىن بەكىتىلەدى، وندا زاڭ جوبالارىنىڭ پارلامەنتكە اكەلۋ مەرزىمدەرى كورسەتىلەدى.
"دەگەنمەن جوسپار ءىس جۇزىندە ساقتالماي وتىر، جىل سوڭىنا قاراي پارلامەنتكە زاڭ جوبالارىن بەرۋ مەرزىمدەرى ۇنەمى وزگەرىپ كەتەدى. مەنىڭ ويىمشا، بۇل جوسپارلاۋدىڭ ساپاسىزدىعى مەن ورىنداۋ ءتارتىبىنىڭ تومەندىگىن كورسەتەدى. وسىعان بايلانىستى زاڭ جوبالارى جوسپارىنىڭ ورىندالۋىن جوسپارلاۋ مەن باقىلاۋدى جاقسارتۋ قاجەتتىگىنە ۇكىمەت وكىلدەرىنىڭ نازارىن اۋدارعىم كەلەدى"، - دەپ اتاپ ءوتتى د.نازاربايەۆا.
سەنات ءتوراعاسىنىڭ ايتۋىنشا، ۇكىمەتتىڭ پارلامەنتكە اكەلەتىن زاڭ جوبالارىنىڭ ساپاسى دا ودان كەيىنگى پروبلەما بولىپ تابىلادى. ۇكىمەت باستاماسىمەن ازىرلەنگەن زاڭ جوبالارى بويىنشا ءماجىلىس اۋقىمدى جۇمىس جۇرگىزەدى، ولارعا تۇزەتۋلەر ەنگىزىپ، كەيدە زاڭ جوباسى قايتا جازىلادى.
دەپۋتاتتاردىڭ كەيبىر تۇزەتۋلەرىنە قارجى شىعىندارى تالاپ ەتىلەدى، وعان ۇكىمەتتىڭ قورىتىندىسى قاجەت بولادى، ال ول ۋاقىت الادى. ۇكىمەتتىڭ قورىتىندىلارى كەلگەنشە كوبىنەسە ءتيىستى مەرزىم بۇزىلادى.
"ءبىر عانا مىسالدى كەلتىرەيىن - جەر قويناۋىن پايدالانۋ، گاز جانە گازبەن جابدىقتاۋ ماسەلەلەرى جونىندەگى زاڭ جوباسى. 11 قىركۇيەكتە ماجىلىسكە ءتۇسىپ، وندا ءۇش اي قارالدى. سەناتقا 12 جەلتوقساندا كەلدى. ەگەر بارلىق مەرەكە جانە دەمالىس كۇندەرىن ەسەپتەن الىپ تاستايتىن بولساق، وندا 3 جۇمىس كۇنىنەن كەيىن ونى پالاتا وتىرىسىندا ءبىرىنشى وقىلىمدا، ال 3 جۇمىس كۇنىنەن كەيىن – ەكىنشى وقىلىمدا قاراۋعا ءماجبۇر بولدىق.
وسىلايشا، سەنات وسى زاڭ جوباسىن سەنات وتىرىسىندا قاراۋ كۇندەرىن ەسكەرە وتىرىپ 8 جۇمىس كۇنى عانا قارادى. بۇل قالاي بولعانى؟ بۇل ءبىزدىڭ جۇمىسىمىزداعى الشاقتىقتىڭ ءبىر عانا مىسالى"، - دەدى د.نازاربايەۆا.
كەزدەسۋ بارىسىندا سونداي-اق زاڭ شىعارۋ ۇدەرىسىندەگى ماڭىزدى بۋىن – ۇكىمەت جانىنداعى زاڭ جوبالاۋ قىزمەتى ماسەلەلەرى جونىندەگى مەكەمەارالىق كوميسسيا اتاپ ءوتىلدى.
"سەنات قابىلداناتىن زاڭداردىڭ ساپاسىنا ءوز وكىلدەرى ارقىلى قانداي دا ءبىر اسەر ەتۋ ءۇشىن زاڭ جوبالارىنىڭ تۇجىرىمدامالارىن باستاپقى كەزەڭدە تالقىلايتىن وسى كوميسسيانىڭ جۇمىسىنا قارقىن بەردى. وسى كوميسسيانىڭ جۇمىسى تۋرالى ەرەجەگە سايكەس، تالقىلاناتىن ماسەلەلەر بويىنشا ماتەريالدار كوميسسيا مۇشەلەرىنە 7 جۇمىس كۇنى ىشىندە ۇسىنىلۋى ءتيىس، ءبىراق ولاردىڭ مەرزىمدەرى ءجيى بۇزىلادى. وسىنداي فاكتىلەرگە جول بەرمەۋگە ادىلەت مينيسترلىگىنىڭ نازارىن اۋدارامىن"، - دەپ اتاپ ءوتتى د.نازاربايەۆا.
سەناتورلاردىڭ زاڭ جوبالارىنا تۇزەتۋلەر ەنگىزۋ قۇقىعى تالقىلاۋدىڭ جەكە سالاسى بولدى. ماسەلەن، سەناتورلار جوباداعى قايشىلىقتاردى انىقتاعاننان كەيىن زاڭ جوباسىن جاقسارتاتىن تۇزەتۋلەردى ۇسىنا باستايدى، ال جوبانى ازىرلەۋشىلەر سەناتورلارعا وسى قايشىلىقتاردىڭ ءبارى تۇزەتىلەتىنىن، ول تۇزەتۋلەر كەلەسى زاڭ جوباسىندا ەسكەرىلەتىنىن ايتىپ سەندىرەدى، ال بۇل زاڭ جوباسىن مەرزىمىنىڭ شەكتەلۋىنە بايلانىستى تۇزەتۋسىز قابىلداۋ قاجەتتىگى ايتىلادى.
"سەناتورلار زاڭ جوباسىن ماجىلىسكە ەشقاشان نەگىزسىز قايتارعان ەمەس ءارى قايتارۋدى ۇسىنبايدى دا. سەناتورلاردىڭ تۇزەتۋلەر ەنگىزۋى مەن زاڭ جوبالارىن ماجىلىسكە قايتارۋدى جۇمىس بابىنداعى ىستەر پروسەسى رەتىندە قالىپتى قاراۋ كەرەك. ءبىزدىڭ بارلىق ۇسىنىستارىمىز سايىپ كەلگەندە زاڭ جوبالارىنىڭ ساپاسىن ارتتىرۋعا باعىتتالعان. ساپاسىز زاڭدار مەملەكەت بيلىگىنىڭ بەدەلىن تۇسىرەدى"، - دەدى د. نازاربايەۆا.
ادىلەت ءمينيسترى مارات بەكەتايەۆ ءوز كەزەگىندە بۇگىنگى تاڭدا زاڭ جوبالارىنىڭ تۇجىرىمداماسىن ازىرلەۋگە دەيىن ولاردى قوعامدا حالىقتىڭ بارلىق مۇددەلى توپتارىمەن اشىق تالقىلاۋ ءۇشىن نەگىزگى ادىس-تاسىلدەردى جاريالاۋعا ارنالعان تەتىكتەر دايىندالىپ جاتقانىن باياندادى.
داريعا نازاربايەۆا سونىمەن قاتار حالىقارالىق كەلىسىمدەردى دايىنداۋ راسىمدەرىن وزگەرتۋدى، ونى ازىرلەۋگە سەناتورلاردى دا قاتىستىرۋدى ۇسىندى. سەنات باسشىسى سونداي-اق ۇكىمەتتىڭ زاڭ جوبالارىن كەلىسۋ رەگلامەنتىن قايتا قاراۋعا نازار اۋداردى جانە ول بۇكىل جۇمىستى سوزىپ جىبەرەتىنى ءارى تەتىكتەرى ناشار جۇمىس ىستەيتىنى اتاپ ءوتىلدى.
سەنات ءتوراعاسى زاڭ جوبالارىنىڭ تۇجىرىمدامالارىن تالقىلاۋدان باستاپ زاڭ قابىلدانعانعا دەيىن مەكەمە مۇددەلەرىن ىسىرا تۇرىپ، ىنتىماقپەن ءارى كەلىسىپ جۇمىس ىستەۋدى ۇسىندى.
"ءاربىر زاڭنىڭ ارتىندا وراسان زور ادامداردىڭ، كاسىپورىنداردىڭ، بيزنەستىڭ تاعدىرى تۇر. بۇل وتە ماڭىزدى ماسەلە. ۇكىمەتتى وسى جىلعا ارنالعان زاڭ جوبالارى جۇمىستارىنىڭ جوسپارىن قايتا قاراۋعا شاقىرامىن، ول جۇمىس ىستەمەي تۇر"، - دەدى د.نازاربايەۆا.
