ايماق باسشىسى دانيال احمەتوۆ شىعىس قازاقستانداعى، جالپى ەلدەگى اۋىلدىق وكرۋگ اكىمدىكتەرى وتكىزەتىن مەملەكەتتىك ساتىپ الۋ ءۇردىسىن جەڭىلدەتۋدى ۇسىنىپ وتىر.



اۋىل اكىمدەرىنىڭ العاشقى رەسپۋبليكالىق فورۋمىندا جەرگىلىكتى ءوزىن-وزى باسقارۋ جۇيەسىنىڭ 2020 جىلعا دەيىن ساتىلاي دەربەس قارجىلاندىرۋعا ءوتۋ ماسەلەسى تالقىلانعان-دى. ناتيجەسىندە اۋىلدىق وكرۋگتەرگە تۇسەتىن بارلىق سالىقتىق تولەمدەر مەكتەپكە دەيىنگى تاربيە مەن وقىتۋعا، ەلدى-مەكەندەردى اباتتاندىرۋ مەن كوگالداندىرۋعا، جول جوندەۋ، سۋمەن قامتۋ جانە باسقا مۇقتاجدىقتارعا جۇمسالادى. وسى سالالارداعى وزەكتى ماسەلەلەردى جىلدام شەشۋ ءۇشىن ءوڭىر باسشىسى فورۋمدا مەملەكەتتىك ساتىپ الۋدا رۇقسات ەتىلەتىن شەكتى سوما كولەمىن ۇلعايتۋ قاجەتتىگىن العا تارتتى. بۇگىندە ول 100 ايلىق ەسەپتىك كورسەتكىشتى قۇرايدى.

– ماسەلەن، ەلەكتر قۋاتىن بەرەتىن جەلىنى تەز ارادا جوندەۋ قاجەتتىگى تۋادى. وسى سياقتى شۇعىل جاعدايلاردا ماسەلەنى شەشۋ ءۇشىن اۋىل اكىمى  ۋاقىت جوعالتىپ، تەندەر راسىمدەرى تۋرالى حابارلاما بەرىپ جۇرمەي، تىكەلەي ءوزى كەلىسىم-شارتقا قول قويا الاتىن قۇزىرى بولۋى شارت. سوندىقتان مەملەكەتتىك ساتىپ الۋ تۋرالى زاڭعا وزگەرتۋ ەنگىزىپ، بايقاۋعا قاتىسپايتىن شەكتى سوما كولەمىن 7-10 ميلليون تەڭگەگە دەيىن ارتتىرسا، دۇرىس بولار ەدى، – دەدى دانيال احمەتوۆ.

ق ر ۇلتتىق ەكونوميكا ءمينيسترى تيمۋر سۇلەيمەنوۆ وبلىس اكىمىنىڭ ۇسىنىسىن قولداپ، ونى ق ر قارجى مينيسترلىگىمەن بىرگە قاراستىراتىنىن جەتكىزدى.

شقو اكىمىنىڭ باسپا ءسوز قىزمەتى