الايدا كەشكە الاڭعا جينالعاندار سانى ارتا ءتۇستى. شقو پوليسيا دەپارتامەنتىنىڭ مالىمەتىنشە، جالپى وبلىس ورتالىعىنداعى تارتىپسىزدىكتەرگە ەكى مىڭعا جۋىق ادام قاتىسقان. ولار مودۋلدىك پوليسيا بەكەتىن ورتەپ، جاقىن ماڭداعى كافەنىڭ تەرەزەلەرىن سىندىردى.
قاقتىعىس ناتيجەسىندە بىرنەشە اسكەري قىزمەتكەر جاراقات الىپ، پوليسيا قىزمەتكەرلەرىنىڭ ءبىرشاماسى زارداپ شەكتى. وسكەمەن اسكەري ءبولىمىنىڭ ەكىنشى اتقىشتار روتاسى باقىلاۋشىلار ۆزۆودىنىڭ كىشى سەرجانتى تىنىس الۋ جولدارىنىڭ حيميالىق كۇيىگىن السا، ال پوليسيا قىزمەتكەرلەرىنىڭ ءبىرى گراناتا سىنىقتارىمەن جارالاندى. ءقازىر زارداپ شەككەندەر ەمدەلۋدە.
شقو اكىمى دانيال احمەتوۆ جاراقات العان اسكەري قىزمەتشىلەرگە ارنايى باردى. ءوڭىر باسشىسى قىزمەتكەرلەردىڭ بەيبىتشىلىك پەن كەلىسىمدى بۇزۋعا تىرىسقاندارعا قارسى توتەپ بەرىپ، وتانىنا الدىنداعى بورىشتارىن وتەگەن ءارقايسىسىنا العىسىن ايتتى.
پوليسيا قىزمەتكەرىنىڭ ايتۋىنشا، بارلىعى ءوز وتانىن جانە ەگەمەن قازاقستان ازاماتتارىن قورعاۋ مىندەتىن اتقارعان.
– ميتينگىگە شىققاندار وبلىس اكىمدىگىنىڭ جانىنداعى قورشاۋ ارقىلى ءوتىپ كەتكەن سوڭ، مەن ولاردى توقتاتا باستادىم. ولار گراناتا لاقتىردى. بەيبىت ازاماتتاردى قورعاپ، كەۋدەمدى وققا توستىم، – دەدى پوليسيا قىزمەتكەرى.
ءوڭىر باسشىسى جاۋىنگەرلەردىڭ تەزىرەك ساۋىعىپ كەتۋىن تىلەپ، ءمىنسىز قىزمەتى ءۇشىن العىسىن ءبىلدىردى.
