قول استىنداعى قىزمەتكەردىڭ شەتىن ارەكەتىنە قىنجىلاتىنىن ايتقان شىعىس قازاقستان وبلىسىنىڭ اكىمى، قاماۋعا الىنعان شەنەۋنىككە قاتىستى تەرگەۋدىڭ اشىق جۇرگىزىلەتىنىن جەتكىزىپ وتىر.
“ريددەر قالاسى اكىمىنىڭ ورىنباسارىنا كەلسەك، ارينە، وتە قايعالى جاعداي. كەشە ول تۇتقىنعا الىندى.
بۇگىن قۇقىق قورعاۋ ورگاندارى قاجەتتى شارالاردى جالعاستىرىپ جاتىر.
ءبىز قازا تاپقان جىگىتتىڭ وتباسىنا كوڭىل ايتىپ، كەشىرىم سۇرادىق. ەندى جاقىن ارادا تەرگەۋ جۇمىستارىنىڭ اياقتالۋىن كۇتەمىز”، – دەيدى شىعىس قازاقستان وبلىسىنىڭ اكىمى دانيال احمەتوۆ.
«BMW ح5» كولىگىن تىزگىندەگەن ريددەر قالاسى اكىمىنىڭ ورىنباسارى باۋىرجان قۇرمانبايەۆ جول شەتىندەگى جۇرگىنشىنى قاعىپ كەتكەن بولاتىن.
19 جاستاعى جىگىت جەدەل جاردەم جەتكەنشە وقيعا ورنىندا كوز جۇمادى.
كەيىن تەكسەرۋ بارىسىندا اكىم ورىنباسارىنىڭ اراققا سىلقيا تويىپ العانى انىقتالعان. ءقازىر 45 جاستاعى ازامات ۋاقىتشا ۇستاۋ يزولياتورىنا توعىتىلعان. ەندى ول ماس كۇيىندە كولىك جۇرگىزىپ، كىسى قاققانى ءۇشىن 5 جىلعا دەيىن سوتتالۋى مۇمكىن.
دەرەككوز: كتك
