تۇركىمەنستان پرەزيدەنتى اشحابادتان قۇنى جۇزدەگەن ميلليون دوللار تۇراتىن سالتاناتتى قوناق ءۇي سالۋ تۋرالى بۇيرىققا قول قويعان.

ءقازىر بۇل ەلدە ەكونوميكالىق داعدارىس بەلەڭ الىپ، ايلىق پەن زەينەتاقى ۋاقىتىندا تولەنبەي كەلەدى.

تۇركىمەنستاننىڭ مەملەكەتتىك اقپارات قۇرالدارىنىڭ جازۋىنشا، جاڭادان سالىناتىن "قاراقۇم" بيزنەس ورتالىعى زاماناۋي قۇرىلعىلارمەن جابدىقتالىپ، ونىڭ جانىنان ءزاۋلىم قوناق ءۇي سالىناتىن بولادى. قۇرىلىستى تۇرىكتىڭ "Rönesans Endüstri Tesisleri Inşaat Sanayi ve Ticaret A.Ş" كومپانياسى جۇزەگە اسىرادى.

قۇرىلىس جۇمىسى 2018 جىلدىڭ قىركۇيەك ايىندا باستالىپ، 2021 جىلدىڭ اقپانىندا اياقتالادى دەپ جوسپارلانعان.

9 قابات بولاتىن قوناق ءۇي 6،9 گەكتار جەردى الماق. ونىڭ قوناق جايعاساتىن 87 بولمەسى بولادى. اينالاسىنا ساۋدا ورتالىعى، مەيرامحانالار، سۇلۋلىق سالوندارى سالىنباق.

بيلىككە جاقىن دەرەككوزدىڭ مالىمەتىنشە، "قاراقۇم" قوناق ءۇيى قۇرىلىسىنىڭ جالپى قۇنى 300 ميلليون دوللار تۇرادى.

بيلىكتەگى قۇرىلىس مەكەمەسىندەگى تاعى ءبىر دەرەككوزدىڭ حابارلاۋىنشا، تۇركىمەن بيلىگى باستاپقىدا فرانسۋزدىڭ "بۋيگ" كومپانياسىمەن كەلىسسوزدەر جۇرگىزگەن. ءبىراق ەكى تاراپ ورتاق كەلىسىمگە كەلە الماعان. كەيىن بۇل جوبانى تۇرىك كومپانياسى قولعا العان.

«قمد» اقپارات