استانا قالاسىندا وتكەن Astana International Forum اياسىندا Corporate Chess Cup 2025 شاحمات ءتۋرنيرى ءوتتى. بۇل ءتۋرنيردىڭ جەڭىمپازى ءارى كورپوراسيالار اراسىنداعى شاحماتتان II الەم چەمپيوناتىنا جولداما يەگەرى ERG (Eurasian Resources Group) كومانداسى بولدى، – دەپ حابارلايدى Dalanews.kz
ءارتۇرلى مالىمەتتەرگە سايكەس، بۇگىندە الەمدە 700 مىڭنان استام بەلسەندى شاحمات اۋەسقويى بار. ال حالىقارالىق شاحمات فەدەراسياسى (فيدە) شاحماتتى تۇراقتى تۇردە وينايتىن ادام سانىن 1 ميلليارقا جەتكىزۋدى ءوز ماقساتتارىنىڭ ءبىرى رەتىندە اتاپ وتەدى. الايدا بۇقارالىق سيپات كوبىنەسە شاحمات فەدەراسيالارى، كلۋبتارى مەن تۋرنيرلەرىنە دەمەۋشىلەر تاراپىنان كورسەتىلەتىن قارجىلاي قولداۋعا تاۋەلدى. وسى سەبەپتى 2024 جىلدىڭ 14-17 ماۋسىم ارالىعىندا نيۋ-يورك قالاسىندا (اقش) وتكەن كورپوراسيالار اراسىنداعى شاحماتتان I الەم چەمپيوناتىنىڭ (FIDE World Corporate Chess Championship) فينالدىق ءتۋرنيرى ۇلكەن قىزىعۋشىلىق تۋدىردى.
2025 جىلى بۇل تۋرنير ەكىنشى رەت وتەدى. وندا باسقا دا كوماندالارمەن قاتار قازاقستاننان ىرىكتەۋ كەزەڭىنەن وتكەن كوماندا دا قاتىسادى. ىرىكتەۋ ءتۋرنيرى رەتىندە Corporate Chess Cup 2025 سايىسى ءوتتى. بۇل جارىستى Astana International Forum (AIF2025) حالىقارالىق فورۋمى اياسىندا KazChess/قازاقستان شاحمات فەدەراسياسى (قشف) Freedom Holding Corp. جانە «استانا» حالىقارالىق قارجى ورتالىعىنىڭ (AIFC) قولداۋىمەن ۇيىمداستىردى.
جارىس 29 مامىردا ساعات 14:30-دا AIFC ساۋدا زالىندا باستالدى. شارانىڭ جوعارى مارتەبەسىن KazChess/قشف ۆيسە-پرەزيدەنتتەرىنىڭ قاتىسۋى ايقىندادى. قۇرمەتتى قوناقتار قاتارىندا فيدە پرەزيدەنتىنىڭ كەڭەسشىسى بەرىك بالعابايەۆ، تۇرىكمەنستان شاحمات فەدەراسياسىنىڭ ءتوراعاسى ۆەپا مياليكگۋلىيەۆ جانە PythonAnywhere بۇلتتى پلاتفورماسىنىڭ سەرىكتەسى، @GRADIA-نىڭ نەگىزىن قالاۋشى جانە اتقارۋشى ديرەكتورى كونراد حو بولدى.
ءتۋرنيردىڭ جۇلدە قورى دا نازار اۋدارۋعا تۇرارلىق: جەڭىمپاز كومانداعا كورپوراسيالار اراسىندا وتەتىن الەم چەمپيوناتى-2025 تۋرنيرىنە (FIDE World Corporate Chess Championship 2025) قاتىسۋ قۇقىعىمەن بىرگە 1 ملن تەڭگە بەرىلدى. 2-ورىن العان كوماندا – ₸650 000، ال 3-ورىن يەگەرى – ₸350 000 يەلەندى. كوماندا ويىنشىلارى مەدالدارمەن جانە ديپلومدارمەن ماراپاتتالدى.
باس تورەشى اسىلحان كارايەۆ جارىستىڭ رەگلامەنتىن قىسقاشا تانىستىرىپ ءوتتى. ق ر مەملەكەتتىك گيمنى مەن فيدە گيمنى ورىندالدى. نەگىزگى 4 ويىنشى جانە قاجەت بولعان جاعدايدا 1 قوسالقى ويىنشىدان قۇرالعان، 2000-نان اسپايتىن ەلو رەيتينگپەن (كلاسسيكا، راپيد، بليس) 20 كوماندا 10+2 ۋاقىت باقىلاۋىمەن (ءار پارتياعا 10 مينۋت جانە ءبىرىنشى جۇرىستەن باستاپ ءار جۇرىسكە 2 سەكۋند) شۆەيسار جۇيەسى بويىنشا 7 تۋر وينادى.
العاشقى تۋرلاردان-اق كوش باسىنا رەيتينگ بويىنشا ۇزدىكتەر شىقتى: ERG (Eurasian Resources Group) (ورتاشا رەيتينگ – 1884)، «قازمەديا ورتالىعى» (بك) ج ش س (1732)، NCOC (North Caspian Operating Company) (1565) جانە Freedom Holding Corp. (1483). 3ء-شى تۋردا، ەكى جەڭىستەن كەيىن وسى كوماندالار بىر-بىرىمەن كەزدەستى: ERG – Freedom Holding Corp. جانە NCOC مەن «قازمەديا ورتالىعى». ءبىرىنشى جۇپتا جەڭىمپاز ايقىندالمادى – 2-2، ال ەكىنشى جۇپتا 3-1 ەسەبىمەن «مۇنايشىلار» جەڭدى. ولار 6 كوماندالىق ۇپايمەن (جەڭىسكە – 2 ۇپاي، تەڭ ويىنعا – 1 ۇپاي، جەڭىلىسكە – 0 ۇپاي بەرىلدى) تۋرنير كەستەسىنىڭ كوشىن جەكە-دارا باستادى.
4ء-شى تۋردا NCOC تاعى ءبىر نەگىزگى قارسىلاسىن – Freedom Holding Corp.-تى 3–1 ەسەبىمەن ۇتتى. قورىتىندى جەڭىسكە ۇمىتكەر بولدى. الايدا 5ء-شى تۋردا ولار ERG كومانداسىنان 1–3 ەسەبىمەن جەڭىلىپ، كوشباسشىلىقتى «ەۆرازيالىقتارعا» بەردى.
جارىس سوڭىنا ەكى تۋر قالعاندا كوشباسشىلار بىلايشا ورنالاستى: ERG – 9 كوماندالىق ۇپاي، NCOC پەن «قازمەديا ورتالىعى» – 8، Freedom Holding Corp. جانە «Mycar Group» – 7. جانە ERG قالعان ۇشتىكپەن ويناپ قويعاندىقتان، مىناداي سۇراق تۋىندادى: «قازمەديا ورتالىعى» كوشباسشى كوماندانى توقتاتا الا ما؟ توقتاتا المادى… ERG – «قازمەديا ورتالىعى» – 4–0. تاس-تالقان ەتتى! سوڭعى تۋردا «ەۋرازيالىقتارعا» Kazakhmys Group قارسى تۇردى، ءبىراق بۇل سەنساسيا جاساي الاتىن قارسىلاس ەمەس ەدى. ال 2½–1½ ەسەبىمەن تىركەلگەن قاراپايىم جەڭىس ناقتى نۇكتە قويدى.
ءتۋرنيردىڭ قورىتىندى ناتيجەلەرى:
- ERG – 13 كوماندالىق ۇپاي، 22½ جەكە ۇپاي؛
- NCOC (North Caspian Operating Company) – 12، 21؛
- Freedom Holding Corp. – 10، 18.
بىردەن التى (!) كوماندا 8 ۇپاي جينادى، سوندىقتان ولاردىڭ ۇشەۋى ءۇشىن تەك جەكە ۇپاي عانا ەمەس، بۋحگولس كوەففيسيەنتى دە ەسەپتەلدى:
4. Astana Hub – 8، 16½؛
5. Allur – 8، 15؛
6. «قازمەديا ورتالىعى بك» ج ش س – 8، 14½، 122؛
7. پرەزيدەنت ءىس باسقارماسى قۇراماسى – 8، 14½، 108½؛
8. ق ر ۇلتتىق بانكى – 8، 14½، 99؛
9. ForteBank – 8، 14.
ال الەم چەمپيوناتىنا جولدامانى ERG (Eurasian Resources Group) كومانداسى جەڭىپ الدى. بۇل كوماندادا تاقتا رەتى بويىنشا موتيۆاسيا جونىندەگى ساراپشى ءادىل دوسوۆ، ديدار يرمانوۆ جابدىقتار مەن ماشينالاردى جوندەۋ شەبەرى، اۋىسپالى اۋىسىمداعى ەلەكتر شەبەرى باۋبەك قوجانيازوۆ، ءوندىرىس پروسەسىندە شيكىزاتتى، جارتىلاي فابريكاتتاردى جانە دايىن ءونىمدى تاسىمالداۋ بويىنشا بريگادير (ءدال سولاي!) مەيرامبەك اقبالين جانە بيزنەس-تالداۋشى دۋمان وسپانوۆ ونەر كورسەتتى.
ايتا كەتەرلىك جايت، «فوربس قازاقستان» سايتىندا 10 جىل بۇرىن شىققان، حرومتاۋدا گروسسمەيستەر، قازىرگى ايەلدەر قۇراماسىنىڭ باس باپكەرى پاۆەل كوسۋر بەرگەن سەانس تۋرالى ماقالادا اقتوبە فەرروقورىتپا زاۋىتىنىڭ بالقىتۋشىسى مەيرامبەك اقبالين مەن سول زاۋىتتىڭ ەلەكتر شەبەرى باۋبەك قوجانيازوۆتىڭ ەسىمدەرى اتالادى.
ال Freedom Holding Corp. قۇرامىندا ەكى تۋردا ونىڭ نەگىزگى اكسيونەرى جانە باس اتقارۋشى ديرەكتورى (CEO)، سونداي-اق KazChess/قشف پرەزيدەنتى تيمۋر تۋرلوۆ وينادى.
