5-13 تامىز ارالىعىندا وتەتىن ۆەلوجارىسقا شىعىس قازاقستان وبلىسى اكىمدىگى بارىنشا قولداۋ كورسەتىپ كەلەدى. بيىل ايتۋلى دودانى قولداۋشىلاردىڭ قاتارىنا ق ر ءبىلىم جانە عىلىم مينيسترلىگىنە قاراستى ۇلتتىق عىلىمي-تەحنيكالىق دەنە-تاربيەسى ورتالىعى مەن قازاقستان ۆەلوسيپەد سپورتى فەدەراسياسى دا قوسىلعانىن ايتا كەتۋىمىز كەرەك.
سپورتتىق شاراعا ايرىقشا قولداۋ تانىتقان شىعىس قازاقستان وبلىسى اكىمى دانيال احمەتوۆ جارىسقا قاتىسۋشىلارمەن بىرگە 25 شاقىرىمدىق ۆەلوتراسسا ءجۇرىپ ءوتىپ، جارىستىڭ شىمىلدىعىن ءتۇرىپ بەردى. ءوز كەزەگىندە اكىم:
– «قازاقستان وقۋشىلارى – 2017» كوپكۇندىك ۆەلوجارىسى – وبلىسىمىزداعى ماڭىزدى، ءارى قىزىقتى سپورتتىق شارالاردىڭ ءبىرى. مۇنداي جارىستار جاستارىمىزدىڭ كۇشتى، دەنساۋلىقتارىنىڭ مىقتى بولۋىن قامتاماسىز ەتەدى. سول سەبەپتى، مەن بۇعان دەيىن ۇيىمداستىرىلعان جارىستارعا قاتىسىپ، ءوزىمدى سىناعانمىن. بۇگىندە سول ادەتىمنەن جاڭىلماي، ۆەلوجارىسقا قاتىسىپ، 25 شاقىرىمدىق جولدى جارىسقا قاتىسۋشىلارمەن ءجۇرىپ ءوتتىم. بيىلعى جارىسقا وزبەكستان كومانداسىنىڭ قاتىسۋى شارانىڭ ماڭىزىن ارتتىرا ءتۇستى دەپ بەلىمىن. جارىسقا قاتىسۋشىلاردىڭ بارىنە ساتتىلىك تىلەيمىن، – دەدى شقو اكىمى.
سوڭعى جىلدارى شىعىس قازاقستان وبلىسىندا ءوتىپ جۇرگەن ۆەلوجارىستى ەڭ العاش 1970 جىلى قازاقستاننىڭ ەڭبەك سىڭىرگەن جاتتىقتىرۋشىسى، ۇستاز الەكساندر انتىشيەۆتىڭ باستاماسىمەن ۇيىمداستىرىلعان-دى. 1999 جىلى الماتىدا ۇيىمداستىرىلعان جارىستان كەيىن، سول كەزدە ق ر پرەمەر-مينيسترى قىزمەتىن اتقارعان دانيال احمەتوۆكە الەكساندر انتىشيەۆ جارىستى ۇزبەي ۇيىمداستىرىپ تۇرۋعا قولداۋ كورسەتۋ تۋراسىندا ۇسىنىس جاساعان-دى. ءوز كەزەگەندە دانيال احمەتوۆ ارداگەر جاتتىقتىرۋشىنىڭ ويىن قولداپ، ۆەلوجارىستى «قازاقستان وقۋشىلارى» دەپ وتكىزىپ تۇرۋدى قولداعان بولاتىن. مىنە، سودان بەرى «قازاقستان وقۋشىلارى» ۆەلەوجارىسى شىعىس قازاقستان وبلىسىندا ۇزدىكسىز ۇيىمداستىرىلىپ كەلەدى.
وسى ءبىر سپورتتىق شارانى شىعىس قازاقستان وبلىسىندا ۇيىمداستىرۋدىڭ وزىندىك سىرى دا جوق ەمەس. شىعىستاعى ۆەلوتراسسادا تاۋلى جانە جازىق جەرلەر كەزدەسەتىنىمەن ەرەكشەلەنەدى. بۇل ۆەلوجولدار ايگىلى ۆۋەلتا، تۋر دە فرانس، دجيرو د’يتاليا ۆەلوجارىستارى وتەتىن تاراسساعا وتە ۇقساس.
«قازاقستان وقۋشىلارى» ۆەلوجارىسىنان وليمپيادا چەمپيونى الەكساندر ۆينوكۋروۆ پەن ترەكتە جۇرگەن الەم چەمپيونى اتانعان الەكسەي ليالكو سىندى ۆەلوشاباندوزدار تۇلەپ ۇشقانىن ايتا كەتۋىمىز كەرەك.
ۇيىمداستىرۋشىلاردىڭ ايتۋىنشا، بيىل شىعىس قازاقستان وبلىسىندا 17 رەت ۇيىمداستىرىلعان جارىسقا 6700 ۆەلوشاباندوز قاتىسىپ، باقتارىن سىناعان.
