الماتى تەحنولوگيالىق ۋنيۆەرسيتەتىندە جاس ديزاينەرلەر مەن سانگەرلەردىڭ «جاس وركەن – 2018» حالىقارالىق بايقاۋى بولىپ ءوتتى. بۇل 2002 جىلدان بەرى وزدەرىن كيىم ديزاينى سالاسىندا تانىتىپ جۇرگەن جاس ديزاينەرلەردىڭ ۇيىمداستىرىلىپ وتىرعان التىنشى بايقاۋى.
– «جاس وركەن – 2018» بايقاۋىن ۇيىمداستىرۋشىلار: «بايقاۋدىڭ نەگىزگى ماقساتى – ستۋدەنت جاستاردىڭ شىعارماشىلىق الەۋەتىن دامىتۋ، ديزاينەرلەر ءۇشىن كاسىبي ورتانى قالىپتاستىرۋ، الەمدىك ءسان يندۋسترياسىنىڭ حالىقارالىق ىنتىماقتاستىق ايماعىن قۇرۋ، – دەيدى.
باسقا تاعىلعان ءمۇيىز، ەركەكتەردىڭ تور شالبارلارى، ۇلتتىق ناقىشتا تىگىلگەن كامۋفلياجدى كويلەكتەر سياقتى ەستەتيكالىق جانە اۆتورلاردىڭ ۇشقىن قيالدارىنان تۋعان تاريحي جانە زاماناۋي ۇلگىلەردى توپتاستىرعان كوللەكسيالار قازاقستاننىڭ مايتالمان سانگەرلەرى – بوتاگوز الدوڭعاروۆا، بيبوتا، جۇلدىزاي جۇماتايەۆا جانە ەكاتەرينا انتونوۆانىڭ ءادىل باعالارىنا ۇسىنىلدى.
بايقاۋدىڭ قورىتىندىسى بويىنشا، fashion يندۋسترياسىنىڭ شەبەرلەرى ەڭ جارقىن، كرەاتيۆتى 3 ديزاينەردىڭ ەسىمدەرىمەن قوسا «Creative art»، «Pret-a-Porte»، «دەبيۋت»، «ەتنو-فيۋجن» نوميناسيا يەگەرلەرىن اتادى. سونىمەن، 3-ورىندى رەسەيدەن كەلگەن قاتىسۋشى ليۋبوۆ زاكيروۆا «اناستاسيا» كوللەكسياسىمەن يەلەندى. 2-ورىن «Omirkul» كوللەكسياسىن تانىستىرعان الماتى ءسان جانە ديزاين كوللەدجىنىڭ ستۋدەنتتەرى اقبوپە تىلەۋحان مەن ماريا گولۋبينسكاياعا بۇيىردى. ال بايقاۋ جەڭىمپازى ءوزىنىڭ «دنك» كوللەكسياسىمەن تاڭ قالدىرعان اتۋ ستۋدەنتى نۇرداۋلەت بەكەتايەۆ اتاندى.
الماتى مەملەكەتتىك جاڭا تەحنولوگيالار كوللەدجىنەن كەلگەن كاميللا ۆولوح، دامير بايچاپانوۆ جانە ينديرا ابدرەشيەۆا «Same&different» اتتى كوللەكسيالارىمەن ەرەكشەلەنىپ، «Pret-a-Porte» نوميناسياسىنىڭ يەگەرلەرى بولدى. ولار مۇمكىندىگى شەكتەۋلى ادامدارعا ارنالعان كيىم كوللەكسياسىن ۇسىندى.
– ءبىز مۇمكىندىكتەرى شەكتەۋلى ادامدارعا ىڭعايلى كيىنىپ جانە وزدەرىن ءستيلدى سەزىنگەندەرىن قالادىق. ولار باسقا ادامدارمەن تەڭ بولۋى كەرەك. وسى ماقساتتا كيىم ديزاينىن جاساۋداعى بارلىق كونسترۋكتيۆتى ەلەمەنتتەردى قامتاماسىز ەتۋگە تىرىستىق ، – دەيدى اۆتورلار.
اقتوتى ءتۇرسىنالى، اتۋ مەديا-ورتالىعىنىڭ قىزمەتكەرى
https://dalanews.kz/8459
