بۇل تۋرالى ايماقتىق كوممۋنيكاسيالار قىزمەتىندە وتكەن باسپاسوز-كونفەرەنسياسىندا كۋرچاتوۆ قالاسىنىڭ اكىمى الەكسەي گلازينسكيي مالىمدەدى. ونىڭ ايتۋىنشا، كۋرچاتوۆ قالاسى بويىنشا شاعىن جانە ورتا كاسىپكەرلىكتى قولداۋعا جەرگىلىكتى بيۋدجەتتەن جالپى كولەمى 56 ملن تەڭگە ءبولىندى، وتكەن جىلدىڭ ەسەپتى كەزەڭىمەن سالىستىرعاندا 7،7 ملن تەڭگەگە ارتىق.
قالادا «بيزنەستىڭ جول كارتاسى – 2025» بيزنەستى دامىتۋ جانە قولداۋ مەملەكەتتىك باعدارلاماسى ءساتتى جۇزەگە اسىرىلۋدا. وندا كاسىپكەرلەرگە گرانتتى قارجىلاندىرۋ، سۋبسيديالاۋ جانە كەپىلدى جوبالار سىندى ماڭىزدى قولداۋ شارالارى كورسەتىلەدى. نەسيەلەر بويىنشا تولەنگەن سۋبسيديالار 960 مىڭ تەڭگەنى قۇرادى.
– التى جەكە كاسىپكەرلىك جوبالارى سۋبسيديا الدى. ولاردىڭ بەسەۋى ساۋدا سالاسىن، بىرەۋى ءسان سالونىن كەڭەيتۋگە باعىتتالدى، – دەدى الەكسەي گلازينسكيي.
بۇدان باسقا، جالپى سوماسى 37 ملن تەڭگەنى قۇرايتىن مەملەكەتتىك گرانت بولۋگە سەگىز سۇرانىم بەرىلدى. ىرىكتەۋ بايقاۋىنىڭ ناتيجەسى بويىنشا اۆتوكەشەندى جانە دەنساۋلىقتى وڭالتۋ جانە دياگنوستيكا ورتالىعىن اشۋ بويىنشا ەكى جوباعا گرانتتى قارجىلاندىرۋ ماقۇلداندى. بولىنگەن گرانتتىڭ جالپى سوماسى شامامەن – 10 ملن تەڭگە.
«ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسىنىڭ ەكىنشى باعىتى – ميكروكرەديت شەڭبەرىندە كۋرچاتوۆ قالاسىندا جالپى سوماسى 15،5 ملن تەڭگەنى قۇرايتىن ءۇش جوبا ىسكە اسىرىلدى. سونىمەن قاتار اتالعان باعدارلاما شەڭبەرىندە 2021 جىلى كۋرچاتوۆ قالاسىنىڭ 19 تۇرعىنىنا ءوز ىستەرىن اشۋ ءۇشىن جالپى سوماسى 11 ملن تەڭگەنى قۇرايتىن گرانتتى قاراجات بەرىلدى.
– ءبىز حالىقتىڭ الەۋمەتتىك-وسال توپتارىنا قولداۋ ءبىلدىرۋ ءۇشىن مەملەكەتتىك باعدارلامالاردى پايدالانامىز. «ەڭبەك» باعدارلاماسى شەڭبەرىندە 20 ادام قىسقا مەرزىمدى كاسىبي ءبىلىم الۋعا جولداما الدى، 13 ادام الەۋمەتتىك جۇمىس ورىندارىنا ورنالاستىرىلدى، 13 ادام جاستار تاجىريبەسىنە، 126 ادام قوعامدىق جۇمىستارعا جولداندى. 28 ادام «باستاۋ-بيزنەس» جوباسى بويىنشا كاسىپكەرلىك نەگىزدەرىن مەڭگەردى، – دەدى الەكسەي گلازينسكيي.
بۇدان بولەك، 20 قالا تۇرعىنىنا 200 اەك بويىنشا مەملەكەتتىك گرانت بەرىلدى. نەگىزىنەن گرانتتار حالىققا قىزمەت كورسەتۋ سالاسى بويىنشا بەرىلدى، جەكەلەي توقتالساق، پودولوگيا كابينەتىن اشۋعا، تىگىن جابدىقتارىن ساتىپ الۋعا، كوسمەتولوگ كابينەتىن اشۋعا، كىلەم تازارتۋ، دەنە ساۋىقتىرۋ ستۋدياسىن اشۋعا، تاماق ءوندىرۋ جانە جەتكىزۋ قىزمەتىن اشۋعا، كينوتەاتر اشۋعا بەرىلدى.
قالا باسشىسىنىڭ ايتۋىنشا، كۋرچاتوۆ قالاسىندا 2021 جىلى 30 كاسىپكەر ءوز ءىسىن اشتى.
