قۋاندىق بيشىمبايەۆ قاتاڭ رەجيمدەگى كولونياعا جەتكىزىلدى، - دەپ حابارلايدى Dalanews.kz. 

"سوتتالۋشى سوت ۇكىمى بويىنشا قاتاڭ رەجيمدەگى مەكەمەگە اۋىستىرىلدى. سونىمەن قاتار، قىلمىستىق-اتقارۋ كودەكسىنىڭ 88 - بابىنا سايكەس سوتتالعاندار تىركەۋگە سايكەس جازاسىن وتەۋ ورىندارىنا جىبەرىلەتىنىن حابارلايمىز"، - دەلىنگەن قاجد حابارلاماسىندا.

كودەكسكە سايكەس وزگە دە اقپارات جاريا ەتۋگە جاتپايدى.

ەسكە سالايىق، بۇعان دەيىن ىشكى ىستەر مينيسترلىگى ەكس-مينيستر قۋاندىق بيشىمبايەۆ كولونيادا قانداي جۇمىس ىستەي الاتىنىن ايتتى.

بۇل تۋرالى ءىىم قىلمىستىق-اتقارۋ جۇيەسى كوميتەتىنىڭ ءتوراعاسى، ادىلەت پولكوۆنيگى تەڭىزجان جانىبەكوۆ ايتتى. 

"بىرىنشىدەن، بيشىمبايەۆ ءالى تەرگەۋ يزولياتورىندا. ەكىنشىدەن، ونىڭ جۇمىس ىستەۋىنە قاتىستى: وندىرىستىك ايماقتاردا ءتۇرلى جۇمىس بار. ول "ەڭبەك" رەسپۋبليكالىق مەملەكەتتىك كاسىپورىندا مىسالى اعاش، مەتالل وڭدەۋ سالاسىنا جۇمىسقا ورنالاسا الادى. قاي جەردە بوس ورىن بولسا سول جەرگە بارا الادى.  

بۇل ماسەلەنى جۇمىسپەن قامتۋ ءبولىمى شەشەدى، كەلگەننەن كەيىن 15 كۇن كارانتيندە بولادى. ءبىز ونى زەرتتەيمىز، ودان ءارى تاربيە جۇمىسى جۇرگىزىلەدى. پسيحولوگتار باسقا تۇتقىندارمەن جۇمىس ىستەگەندەي بيشىمبايەۆ پەن دە جۇمىس ىستەيدى"، - دەيدى جانىبەكوۆ. 

ەسكە سالايىق، 26 ماۋسىمدا قۋاندىق بيشىمبايەۆ پەن باقىتجان بايجانوۆقا قاتىستى قىلمىستىق ءىستىڭ اپەللياسيالىق سوت وتىرىسى بولعان ەدى. الايدا ولاردىڭ اپەللياسيالىق ءوتىنىشى قاناعاتتاندىرىلمادى.

قۋاندىق بيشىمبايەۆ 24 جىلعا، ءىنىسى باقىتجان بايجانوۆ 4 جىلعا سوتتالعان بولاتىن.