ايەلى سالتانات نۇكەنوۆانى ءولتىردى دەپ ايىپتالىپ وتىرعان قۋاندىق بيشىمبايەۆ پەن ەكس-مينيستردىڭ تۋىسى باقىتجان بايجانوۆقا مامىر مەرەكەلەرىنەن كەيىن ۇكىم شىعۋى مۇمكىن، دەپ حابارلايدى Dalanews.kz.
بۇگىن، 6 مامىردا بيشىمبايەۆ پەن بايجانوۆ سوڭعى ءسوزىن ايتقاننان كەيىن سۋديا ايجان كولبايەۆا ءۇزىلىس جاريالادى. كەلەسى وتىرىس 10 مامىر ساعات 10.00-دە وتەدى. قىلمىستىق ءىس جۇرگىزۋ كودەكسىنە سايكەس، كەلەسى راسىمدەر – القابيلەردىڭ سۇراقتارىن ىرىكتەۋ جانە ۇكىم شىعارۋ.
كۋلۋارلاردا جابىرلەنۋشى تاراپتىڭ ادۆوكاتى سۇراقتاردى ىرىكتەۋ قانشا ۋاقىتقا سوزىلۋى مۇمكىن ەكەنىن ايتتى.
"بۇل القابيلەردىڭ كەڭەسۋ بولمەسىندە قانشا ۋاقىت وتىراتىنىنا بايلانىستى. مەنىڭ ويىمشا، 10 مامىردا جارتى كۇن سۇراقتاردى دايىنداۋعا كەتەدى. ويتكەنى سۇراقتاردى دايىنداۋ كەزىندە قورعاۋشى تاراپ پەن ءبىزدىڭ ارامىزدا داۋ بولاتىنى انىق. قالاي بولعاندا دا، سۋديا ونى رەتتەپ وتىرادى، ال قالعانىن القابيلەر شەشەدى. ول سول كۇنى شەشىم قابىلداۋى مۇمكىن نەمەسە سوت بارىسىندا ايتىلعان ماتەريالداردى ودان ءارى زەرتتەۋ ءۇشىن ۋاقىت قاجەت بولۋى مۇمكىن. مەنىڭ ويىمشا، وعان كەمىندە ءبىر كۇن كەتەدى"، – دەدى يگور ۆرانچيەۆ.
ايتا كەتەيىك، بۇگىنگى سوت وتىرىسىندا ەكى ايىپتالۋشى - بيشىمبايەۆ پەن بايجانوۆ سوڭعى سوزدەرىن ايتتى. سوتتا ەكس-مينيستر سالتاناتتىڭ جاقىندارى، ءوزىنىڭ اتا-اناسى مەن بالالارىنان كەشىرىم سۇرادى. سونىمەن قاتار بيشىمبايەۆ القابيلەردەن ءادىل شەشىم شىعارۋدى، پروپاگانداعا ىلەسپەۋىن سۇرادى. ال بايجانوۆ جاساعان ىستەرى قىلمىستى جاسىرۋ دەپ ەسەپتەلەتىنىن بىلمەگەنىن ايتىپ، مارقۇمنىڭ جاقىندارىنان تاعى دا كەشىرىم سۇرادى.
