Áieli Saltanat Núkenovany óltirdi dep aiyptalyp otyrǵan Qýandyq Bishimbaev pen eks-ministrdiń týysy Baqytjan Baijanovqa mamyr merekelerinen keiin úkim shyǵýy múmkin, dep habarlaidy Dalanews.kz.
Búgin, 6 mamyrda Bishimbaev pen Baijanov sońǵy sózin aitqannan keiin sýdia Aijan Kólbaeva úzilis jariialady. Kelesi otyrys 10 mamyr saǵat 10.00-de ótedi. Qylmystyq is júrgizý kodeksine sáikes, kelesi rásimder – alqabilerdiń suraqtaryn irikteý jáne úkim shyǵarý.
Kýlýarlarda jábirlenýshi taraptyń advokaty suraqtardy irikteý qansha ýaqytqa sozylýy múmkin ekenin aitty.
"Bul alqabilerdiń keńesý bólmesinde qansha ýaqyt otyratynyna bailanysty. Meniń oiymsha, 10 mamyrda jarty kún suraqtardy daiyndaýǵa ketedi. Óitkeni suraqtardy daiyndaý kezinde qorǵaýshy tarap pen bizdiń aramyzda daý bolatyny anyq. Qalai bolǵanda da, sýdia ony rettep otyrady, al qalǵanyn alqabiler sheshedi. Ol sol kúni sheshim qabyldaýy múmkin nemese sot barysynda aitylǵan materialdardy odan ári zertteý úshin ýaqyt qajet bolýy múmkin. Meniń oiymsha, oǵan keminde bir kún ketedi", – dedi Igor Vranchev.
Aita keteiik, búgingi sot otyrysynda eki aiyptalýshy - Bishimbaev pen Baijanov sońǵy sózderin aitty. Sotta eks-ministr Saltanattyń jaqyndary, óziniń ata-anasy men balalarynan keshirim surady. Sonymen qatar Bishimbaev alqabilerden ádil sheshim shyǵarýdy, propagandaǵa ilespeýin surady. Al Baijanov jasaǵan isteri qylmysty jasyrý dep esepteletinin bilmegenin aityp, marqumnyń jaqyndarynan taǵy da keshirim surady.
