ايەلىن ءولتىردى دەگەن ايىپ تاعىلىپ وتىرعان ەكس-مينيستر قۋاندىق بيشىمبايەۆتىڭ ءىسى بويىنشا سوت وتىرىسى جالعاسىپ جاتىر. جوعارعى ءسوزدىڭ باسپا ءسوز قىزمەتى ەندىگى اشىق سوت وتىرىستارى ونلاين كورسەتىلەتىنىن جاريا ەتتى، - دەپ حابارلايدى Dalanews.kz.
"قۋاندىق بيشىمبايەۆقا قاتىستى سوت پروسەسىنە قوعامنىڭ جوعارى قىزىعۋشىلىعىن ەسكەرە وتىرىپ، وسى ءىس بويىنشا اشىق سوت وتىرىستارىنىڭ ونلاين-ترانسلياسياسىن ۇيىمداستىرۋ تۋرالى شەشىم قابىلداندى"، - دەپ جازىلعان حابارلامادا.
بۇگىن استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قۋاندىق بيشىمبايەۆتىڭ ءىسى بويىنشا القابيگە كانديداتتاردى ىرىكتەۋ ءۇشىن جابىق سوت وتىرىسى وتەدى.
وتىرىستا 12 ادامنان تۇراتىن (10 نەگىزگى، 2 قوسالقى) القابيلەر القاسى قالىپتاستىرىلادى. ىرىكتەۋ القابيلەردىڭ جەكە باسىن جاريا ەتۋ مۇمكىندىگىن بولدىرماۋ ءۇشىن جابىق سوت وتىرىسىندا وتەدى.
ايتا كەتەيىك، بىلتىر قۋاندىق بيشىمبايەۆ ايەلىن ۇرىپ ءولتىردى دەگەن كۇدىكپەن قاماۋعا الىندى. ءقازىر سوت وتىرىسى ءوتىپ جاتىر. بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ بۇل ءبىرىنشى قىلمىستىق ءىسى ەمەس.
ول 2018 جىلعى ناۋرىزدا 10 جىلعا باس بوستاندىعىنان ايىرىلعان بولاتىن. بۇرىنعى شەنەۋنىك پارا الۋ جانە اقشا جىمقىرۋ ىستەرىندە ايىپتى دەپ تانىلعان ەدى. بيشىمبايەۆتىڭ سوت ءىسى ءتورت ايدان اسا ۋاقىتقا سوزىلدى. ونىمەن بىرگە بۇل ىستە 22 ادام سوتقا تارتىلعان ەدى. ولار "بايتەرەك DEVELOPMENT" اق ەكس-قىزمەتكەرلەرى، كاسىپكەرلەر جانە قۇرىلىس كومپانيالارىنىڭ وكىلدەرى بولدى. ەكس-شەنەۋنىك 10 جىلعا سوتتالسا دا، تۋرا 19 اي وتكەندە بوستاندىققا شىقتى.
بۇعان دەيىن ابزال قۇسپان ونىڭ بۇلاي ەرتە بوساپ شىعۋىنىڭ قانداي قۇپياسى بار ەكەنىن ايتتى.
"مەرزىمىنەن بۇرىن بوساتۋدىڭ ەكى فورماسى بار، ءبىرىنشىسى - مەرزىمىنەن بۇرىن بوساتۋ، ەكىنشىسى - جەڭىل جازاعا اۋىستىرۋ. وسى ەكى دۇنيە سىبايلاس جەمقورلىق سيپاتىنداعى قىلمىستىق ىستەرگە قاتىستى قولدانىلمايدى. پرەزيدەنت جانىنداعى كوميسسيا ءالى بار، ءدال ءقازىر قالاي جۇمىس ىستەپ جاتقانىن بىلمەيمىن. ەكس-پرەزيدەنتتىڭ تۇسىندا ول قاتتى جۇمىس جاسادى.
سوتتار مىنا جاقتان كىناسىن دالەلدەپ، اق تەر، كوك تەر بولىپ، ءىستى قىلىپ، ادامدى سوتتايدى. ول كەزدە نازاربايەۆتان كەشىرىم سۇراعان شەنەۋنىكتەر شىعىپ كەتەتىن ەدى. كەشىرىم سۇراماعان ادامدار ەكسپوعا قاتىستى سوتتالعان ەرمەگيايەۆ سياقتى ءالى كۇنگە جازاسىن وتەپ جاتىر.
ودان دا زور قىلمىس جاساعان ادامدار بۇگىن كەشىرىم سۇراپ، ەرتەسى كۇنى بوساپ كەتكەن جايى بار. سوندىقتان بيشىمبايەۆ مەرزىمىنەن بۇرىن بوساپ شىققان جوق، پرەزيدەنتتەن كەشىرىم سۇراپ، پرەزيدەنتتىڭ جانىنداعى كوميسسيا ارقىلى بوساپ شىقتى"، - دەپ ءتۇسىندىردى زاڭگەر Usbanov ARNASY-نا بەرگەن سۇحباتىندا.
