تۇركىستان وبلىسىندا مەكتەپ تۇلەكتەرىنىڭ قاتىسۋىمەن «مەكتەبىم، ساعان مىڭ العىس!» اتتى سالتاناتتى ءىس-شارا مەكتەپ قابىرعاسىندا وتكىزىلدى. تۇركىستان وبلىسى اكىمىنىڭ ورىنباسارى بەيسەنباي تاجىبايەۆ وبلىس ورتالىعىندا ورنالاسقان №15 م.جۇمابايەۆ اتىنداعى مەكتەپ-گيمنازياسىنداعى سوڭعى قوڭىراۋ راسىمىنە قاتىسىپ،جاس تۇلەكتەرگە جىلى لەبىزىن ءبىلدىردى.
اياقتالعالى وتىرعان وقۋ جىلى ءوڭىر ءۇشىن دە جەمىستى جىل بولدى. 2024-2025 وقۋ جىلىندا 33 884 وقۋشى 11-سىنىپتى ءتامامدادى. ونىڭ 2313ء-ى – «التىن بەلگىگە» ۇمىتكەرلەر، 2400 وقۋشى جالپى ورتا ءبىلىم بەرۋ تۋرالى «ۇزدىك اتتەستاتقا» ۇمىتكەر اتاندى. ال ۇلتتىق ءبىرىڭعاي تەستىلەۋگە قاتىسۋعا 27 386 وقۋشى ءوتىنىم بىلدىرگەن.
– سىزدەردى وقۋ جىلىنىڭ اياقتالۋىمەن قۇتتىقتايمىن! بيىل ناۋرىز ايىندا وتكەن ۇلتتىق قۇرىلتايدا مەملەكەت باسشىسى قاسىم-جومارت كەمەل ۇلى «ءبىزدىڭ باستى كۇشىمىز – ادام جانە ونىڭ جاسامپازدىق الەۋەتى» دەپ ايتقان بولاتىن. وسى وقۋ جىلىندا وبلىستا ءبىلىم سالاسىندا بارلىق ءبىلىم الۋشىلاردىڭ جاعدايى ءۇشىن كوپتەگەن جۇمىستار اتقارىلدى. تۇركىستان وبلىسىندا بيىلعى وقۋ جىلىندا جالپى 1093 مەكتەپتە 553 مىڭنان استام وقۋشى ءبىلىم الدى. وبلىس وقۋشىلارى ءارتۇرلى رەسپۋبليكالىق وليمپيادالار مەن عىلىمي جوبالارعا قاتىسىپ، 12 التىن، 16 كۇمىس، 27 قولا مەدال يەلەندى. ەلىمىزدىڭ بولاشاعى – سىزدەردىڭ قولدارىڭىزدا. سوندىقتان ءار كەزدە تەرەڭ ءبىلىم الۋ جولىندا جالىقپاي، تالماي، ىزدەنىپ، ەل تىزگىنىن ۇستايتىن ازامات بولۋلارىڭىزدى تىلەيمىن، – دەدى بەيسەنباي داۋلەت ۇلى.
2026-2028 جىلدار ارالىعىندا تۇركىستان وبلىسىندا 16100 ورىندى 53 مەكتەپ سالۋ جوسپارلانۋدا. وبلىستا بيىل 100-دەن مەكتەپتە اعىمداعى جوندەۋ جۇمىستارى جۇرگىزىلەدى.
ايتا كەتەيىك، ق ر وقۋ-اعارتۋ مينيسترلىگىنىڭ بۇيرىعىنا سايكەس وقۋ جىلى 34 اپتاعا جالعاستى. بۇگىن بارلىق 1-11 سىنىپ وقۋشىلارى ءۇشىن «ءبىلىمىم – وتانىما» تاقىرىبىندا ءبىرىڭعاي سىنىپ ساعاتى وتكىزىلدى. بۇل وقۋشىلاردىڭ جىل بويى العان ءبىلىمىن قورىتىندىلاپ، وتانسۇيگىشتىككە تاربيەلەۋگە باعىتتالعان.
اياقتالعالى وتىرعان وقۋ جىلى وبلىس ءۇشىن جەمىستى جىل بولدى. 2024-2025 وقۋ جىلىنداعى قوعامدىق-گۋمانيتارلىق جانە جاراتىلىستانۋ باعىتتاعى رەسپۋبليكالىق وليمپياداعا قاتىسۋشى-كوماندالاردىڭ ساپالىق رەيتينگى بويىنشا تۇركىستان وبلىسى ۇزدىك ۇشتىكتە. سونداي-اق قازاقستان رەسپۋبليكاسى وقۋ-اعارتۋ ءمينيسترى عاني بەيسەمبايەۆتىڭ ءبىلىم سالاسىنداعى 20 ولشەمشارتتان تۇراتىن رەيتينگ كورسەتكىشىنىڭ ناتيجەسىندە رەسپۋبليكا بويىنشا «ۇزدىك 100 مەكتەپتىڭ» قاتارىنا تۇركىستان وڭىرىنەن 5 ءبىلىم ورداسى ەندى.
شارا سوڭىندا مەكتەپتىڭ ۇزدىك وقۋشىلارى ارنايى ماراپاتتالىپ، ونەرلى وقۋشىلارى پاتريوتتىق اندەر ورىندالىپ، مىڭ بۇرالعان بيشىلەر كورەمەننىڭ ىستىق ىقىلىسىنا بولەدى.
