باتىس قازاقستان وبلىسىندا كيىك پوپۋلياسياسىن رەتتەۋ ماقساتىندا جاڭا شارالار قولعا الىنۋدا، دەپ حابارلايدى Dalanews.kz.
وسى تۇستا جاڭگىر حان اتىنداعى باتىس قازاقستان اگروتەحنيكالىق ۋنيۆەرسيتەتىنىڭ عالىمدارى كيىكتى قازاقستاننىڭ ءار وڭىرىنە جەرسىندىرىپ، قولعا ۇيرەتۋ ماسەلەلەرىن عىلىمي نەگىزدە قاراستىرىپ جاتقانىن مالىمدەدى.
ەكولوگيا جانە تابيعي رەسۋرستار مينيسترلىگى 2024 جىلى ورال پوپۋلياسياسىنداعى 200 مىڭ جانە بەتپاقدالاداعى 100 مىڭ اقبوكەندى اتۋعا رۇقسات بەرىلگەنىن جەتكىزدى. ولاردى جويۋ مەرزىمى 2024 جىلدىڭ 10 قاڭتارىنان 29 اقپانىنا دەيىن ۇسىنىلدى. ناتيجەسىندە بيىل قىركۇيەك ايىنان قاراشا ايىنا دەيىن اقبوكەندەر سانىن رەتتەۋ بويىنشا جۇرگىزىلەتىن شارالار جالعاساتىنىن مالىمدەدى.
ۆەدومستۆو بىلتىر 16 قازاننان 10 جەلتوقسانعا دەيىن "بيولوگيالىق نەگىزدەمەگە" سايكەس تابيعي ورتادان 30 185 اقبوكەن "تاركىلەنىپ"، ەت كومبيناتتارىنا وڭدەۋگە 630 توننا اقبوكەن ۇشاسى جىبەرىلگەنىن ايتتى.
سونىمەن قاتار بيىل سپورتتىق ماقساتتا اقبوكەن اۋلاۋ ماسەلەسى پىسىقتالىپ جاتىر.
"بۇعان بايلانىستى مينيسترلىك اقبوكەنگە اڭ اۋلاۋ ماسەلەلەرىن رەتتەيتىن ءبىرقاتار نورماتيۆتىك-قۇقىقتىق اكتىنى ازىرلەدى. ءتيىستى جوبالار "اشىق نقا" پورتالىنا ورنالاستىرىلدى"، – دەلىنگەن ۆەدومستۆو حابارلاماسىندا.
