بۇگىندە قالانىڭ بارلىق اۋدانىندا اۋلالار مەن قوعامدىق كەڭىستىكتەردى اباتتاندىرۋ جۇمىسى ءجۇرىپ جاتىر.
بيىل 150-دەن استام اۋلا مەن قوعامدىق كەڭىستىكتى (ساياباقتار، گۇلزارلار، جەلەكجولدار) اباتتاندىرىلماقشى. ولاردىڭ ءبارى قالا تۇرعىندارىنىڭ بوس ۋاقىتىن جايلى ءارى دەنساۋلىعىنا پايدالى كۇيدە وتكىزە الاتىن تارتىمدى ورىنداردىڭ بىرىنە اينالادى.
– بۇگىن ءبىرقاتار اۋلالار مەن قوعامدىق كەڭىستىكتەردىڭ قۇرىلىسىمەن تانىستىم. ماسەلەن، جاقىندا «اممان» جانە «ابىلاي حان» كوپىرلەرىنىڭ استىندا جاياۋ جۇرگىنشىلەر وتكەلدەرى اشىلادى. ولار اقبۇلاق وزەنىنىڭ بويىنداعى ساياباق كلاستەرىمەن جالعاسادى. اۆتوتۇراق كەڭىستىگى («الاتاۋ» سك-عا قاراما-قارسى) جاياۋ جۇرگىنشىلەر ايماعىنا اينالدى، وسىلايشا جاياۋ جۇرگىنشىلەر ءۇشىن ىڭعايلى بولار ءبىرىڭعاي تۇجىرىمداما جاسالدى. ال جاعالاۋ بويىنا سپورت جانە ويىن الاڭدارىن ورناتامىز، – دەدى قالا اكىمى.
سونىمەن قاتار ساتبايەۆ كوشەسىندە قاجىمۇقان كوشەسىنەن پەتروۆ كوشەسىنە دەيىنگى ارالىعى جاڭارتىلماقشى. مۇندا قالا تۇرعىندارىنىڭ دەمالۋعا ارنالعان ورىندار، كولەڭكەلى شاتىرلار، ويىن الاڭدارى، ۆەلوجولدار جانە ورناتىلادى.
اكىم الداعى ۋاقىتتا ورتالىق جاعالاۋدىڭ تاريحي كوشەلەرى دە (جەلتوقسان، بەيبىتشىلىك، بۇقارباي باتىر كوشەلەرى) جاڭارتىلاتىنىن جا جەتكىزدى. بۇل جاڭادان اباتتاندىرىلعان ورىنداردى وسىعان دەيىن اشىلعان ورىندارمەن بىرىكتىرۋگە مۇمكىندىك بەرەدى. وسىلايشا سەرۋەندەۋگە ارنالعان ۇلكەن كەڭىستىك قۇرىلادى.
اكىمدىك الداعى ۋاقىتتا قالانى اباتتاندىرۋمەن قاتار كوگالداندىرۋ ماسەلەسىنە دە ەرەكشە نازار اۋدارۋدى جوسپارلاپ وتىر. بيىل ءبىر ميلليون جاسىل جەلەك وتىرعىزۋ كوزدەلۋدە.
