ارىس ۇلكەن قالا. مۇندا 75 مىڭعا جۋىق ادام تۇرادى. حالىق سانى دا جىل ساناپ ءوسىپ كەلەدى.
ءۇي كەزەگىندە تۇرعانداردىڭ سانى 1300-دەن اسىپ جىعىلادى. ولاردى باسپانامەن قامتۋ باعىتىندا ءبىراز جۇمىس جاسالدى.
سونىڭ ءبىرى دالەلى، كۇنى كەشە كوكتەم-2 مولتەك اۋدانىندا 36 پاتەرلىك 3 قاباتتى ءتۇرعىن-ۇيدىڭ قۇرىلىسىن اياقتادىق. الداعى كۇندەرى قالاداعى ءۇي كەزەگىندە تۇرعان ءبىراز وتباسى قونىس تويىن تويلايتىن بولادى.
بۇل قولعا الىنعان ءىستىڭ باستاماسى عانا. ءدال وسى نوبايداعى تاعى 3 ءتۇرعىن-ۇي سالىنىپ جاتىر. ولار كەلەر جىلى قولدانىسقا بەرىلمەك.
بۇدان بولەك 5 قاباتتى، 66 پاتەرلىك، 5 ءتۇرعىن-ۇيدىڭ ىرگەتاسىن قالاپ قويدىق. وسىلايشا الداعى جىلى 500-گە تارتا وتباسى ءۇيلى بولادى دەپ جوسپارلاپ وتىرمىز. وسىنىڭ ناتيجەسىندە ءۇي كەزەگىندە تۇرعانداردى ۇزاق كۇتتىرمەي باسپانامەن قامتيتىن بولامىز.
بۇدان بولەك اتالعان اۋداندا اۋرۋحانا، مەكتەپ، بالاباقشا سەكىلدى الەۋمەتتىك نىساندار دا بوي كوتەرەدى. ءقازىردىڭ وزىندە مۇندا 450 بالاعا لايىقتاعان بالاباقشا، 300 وقۋشىعا ورنالعان مەكتەپ جۇمىس ىستەپ تۇر. اۋداننىڭ اۋماعى ۇلكەيە كەلە ءبىلىم ورداسىنىڭ تارلىق ەتۋى مۇمكىن.
جاقىن ارادا ءدال وسى مەكتەپتىڭ ىرگەسىنەن تاعى 300 وقۋشىعا ارنالعان قوسىمشا كورپۋستىڭ ىرگەسىن قالايمىز.
كەلەر جىلى مەملەكەتتىك-جەكەمەنشىك ارىپتەستىك اياسىندا كوكتەم-2 مولتەك اۋدانىندا تاعى ءبىر بالاباقشا سالىنادى. سونىمەن قاتار اۋداندىق ىشكى ىشكى ىستەر باسقارماسى مەن سوت عيماراتى وسى جەردە ورنالاساتىن بولادى.
– ەستۋىمىزشە، ارىستاعى كوپقاباتتى ۇيلەردىڭ – كارىز جۇيەسىندە اقاۋ كوپ ەكەن. جاڭادان قۇرىلعان اۋداندا وسى ماسەلە قالاي شەشىلمەك؟
– كوكتەم-2 مولتەك اۋدانىنداعى الداعى ۋاقىتتا قولدانىسقا بەرىلەتىن پاتەرلەردىڭ بارلىعى ورتالىقتاندىرىلعان كارىز جۇيەسىنە قوسىلعان.
كارىز قۇبىرلارىنىڭ قۇرىلىسى بويىنشا ارنايى جوبا دا جاسالدى. مەملەكەت تاراپىنان بۇل جوباعا 1-1،5 ملرد. تەڭگە قارجى بولىنەدى دەپ كۇتىپ وتىرمىز.
– ارىستا اۋىز-سۋ ماسەلەسى دە وزەكتى ەكەنىن بىلەمىز. حالىقتى ساپالى اۋىز-سۋمەن قامتۋدا قانداي شارالاردى قولعا الماقسىزدار؟ ءبىز بىلسەك، ارىس قالاسىنا جاقىن ورنالاسقان اقدالا ەلدىمەكەنىندە بەرتىنگە دەيىن تىرشىلىك ءنارى ساعاتپەن بەرىلىپ كەلىپتى.
– بۇگىنگى كۇنى ارىس قالاسىنىڭ اۋماعىندا ورتالىقتاندىرىلعان اۋىز-سۋمەن حالىقتىڭ 90 پايىزى قامتاماسىز ەتىلگەن. بيىلعى جىلى ارىسقا قاراستى 7 ەلدى-مەكەندە اۋىز-سۋمەن قامتۋ بويىنشا بىرنەشە اۋقىمدى جوبا قولعا الىندى. جىل سوڭىنا دەيىن وسى ماقساتتا بيۋدجەتتەن بولىنگەن اقشانى تولىعىمەن يگەرىپ، اتالعان ەلدى-مەكەندەردى ورتالىقتاندىرىلعان اۋىز-سۋ جۇيەسىنە قوسامىز. مۇنىڭ ىشىندە اققالا، بايتوعاي، شوگىرلى سەكىلدى اۋىل-ايماقتار بار.
