ەڭبەك جانە حالىقتى الەۋمەتتىك قورعاۋ مينيسترلىگى Burger King Kazakhstan كومپانياسىنا قاتىستى جاعدايدى رەسمي تۇردە باقىلاۋعا العانىن مالىمدەدى، دەپ حابارلايدى Dalanews.kz.
الماتى قالاسىنىڭ مەملەكەتتىك ەڭبەك ينسپەكتورى الىبەك قاراتايدىڭ وتباسىنا ارنايى بارىپ، ونىڭ اكەسىنە رەسمي شاعىمدى قالاي دۇرىس راسىمدەۋ كەرەگىن ءتۇسىندىرىپ، ەڭبەك زاڭناماسىندا قاراستىرىلعان قۇقىقتار مەن كەپىلدىكتەر تۋرالى تولىق اقپارات بەرگەن.
مينيسترلىك تاراتقان مالىمەتكە سايكەس، جۇمىس بەرۋشى – "QSR" ج ش س (Burger King) ۇيىم ىشىندە قىزمەتتىك تەكسەرىس جۇرگىزىپ جاتىر. تەرگەۋ كەزەڭىندە باسشىلاردىڭ ءبىرى ۋاقىتشا قىزمەتىنەن شەتتەتىلگەن.
ال كومپانيا ءوز تاراپىنان قىزمەتكەردىڭ جۇمىستان شىعارىلماعانىن اتاپ ءوتتى. ايتۋلارىنشا، جاعدايدى بەيبىت تۇردە شەشۋ ءۇشىن بىرنەشە ۇسىنىس جاسالعان. سونىڭ ىشىندە قىزمەتكەردى باسقا مەيرامحاناعا اۋىستىرۋ مۇمكىندىگى قاراستىرىلىپ وتىر. سونىمەن قاتار كومپانيا قىزمەتكەر مەن ونىڭ وتباسىنىڭ قاتىسۋىمەن اشىق ديالوگ جۇرگىزۋگە دايىن ەكەنىن جەتكىزدى.
ماسەلەنىڭ ءمان-جايى
ايتا كەتەيىك، قازاقستاندا Burger King Kazakhstan جەلىسىنە قاتىستى داۋ الەۋمەتتىك جەلىدەگى جازبادان كەيىن كۇشەيە ءتۇستى.
داۋدىڭ باستالۋىنا الەۋمەتتىك كاسىپكەر جانات قاراتايدىڭ ۇلى – اۋتيزم سپەكترىندەگى بۇزىلىسى بار 27 جاستاعى الىبەك قاراتايدىڭ ەڭبەك جولى تۋرالى جازباسى سەبەپ بولدى.
اناسىنىڭ ايتۋىنشا، الىبەك ەكى جاسىنان باستاپ دامۋ ەرەكشەلىكتەرى بايقالعان بالا. سول كەزەڭدە "اۋتيزم" ۇعىمى كەڭ تاراماعاندىقتان، ول بالاسىنىڭ جاعدايىن ءوز بەتىنشە زەرتتەپ، جىلدار بويى پەداگوگيكا مەن وڭالتۋعا تولىق دەن قويعان. ناتيجەسىندە الىبەك مەكتەپتى ءتامامداپ، جۇرگەنوۆ اتىنداعى كوللەدجدە ءبىلىم الىپ، ءمۇسىنشى ماماندىعىن مەڭگەرگەن. پلاستيليننەن انيماسيالىق مۋلتفيلمدەر جاساۋعا قىزىعىپ، ءتۇرلى جەردە جۇمىس ىستەپ كورگەن.
اقىرى وزىنە ۇنايتىن ماماندىق پەن ۇجىمدى Burger King مەيرامحاناسىنان تاپقان. ول جەردە ءتورت جىل بويى اسپاز بولىپ تۇراقتى ەڭبەك ەتىپ، جالاقى الىپ، تاپقان تابىسىن ءوز قالاۋىنشا جۇمساپ، ءوزىن ۇجىمنىڭ تولىققاندى مۇشەسى رەتىندە سەزىنگەن. قاجەت كەزدە قوسىمشا اۋىسىمدارعا قالىپ، دەمالىسىن ءوزى جوسپارلاپ، ءبىر فيليالدان ەكىنشىسىنە اۋىسىپ جۇمىس ىستەپ جۇرگەن. اناسىنىڭ سوزىنشە، بۇل – وتباسى مەن مەيرامحانا مەنەدجەرلەرىنىڭ بىرلەسكەن ەڭبەگىنىڭ ناتيجەسى بولعان.
الايدا جاڭا وڭىرلىك باسشى كەلگەننەن كەيىن جاعداي وزگەرگەن. جانات قاراتايدىڭ ايتۋىنشا، سول ساتتەن باستاپ ۇلىنا جاسىرىن قىسىم كورسەتىلە باستاعان. كۇزدەن بەرى الىبەكتىڭ مىنەز-قۇلقى وزگەرىپ، كەيىن ونى جۇمىستان كەتۋگە يتەرمەلەپ جاتقانىن بىلگەن. ءقازىر وتباسى ونىڭ ادامدارعا دەگەن سەنىمىن قايتا قالپىنا كەلتىرۋگە تىرىسىپ جاتقانىن ايتقان.
وسى جازبادان كەيىن قوعامدا قىزۋ تالقىلاۋ باستالدى. Burger King Kazakhstan الەۋمەتتىك جەلىدەگى جاريالانىمعا قاتىستى رەسمي مالىمدەمە جاساپ، جاعداي وتباسى ءۇشىن اۋىر تيگەنىنە وكىنىش ءبىلدىرىپ، تەڭ مۇمكىندىك پەن ينكليۋزيۆتىلىك قاعيداتتارىن ۇستاناتىنىن مالىمدەدى. كومپانيا ىشكى تەكسەرىس باستالعانىن جانە الىبەكتىڭ جۇمىستان شىعارىلماعانىن حابارلادى.
دەگەنمەن الەۋمەتتىك جەلى قولدانۋشىلارىنىڭ سىنى كۇشەيىپ، كەيبىر ازاماتتار كومپانيانى بويكوت جاريالاۋعا شاقىرىپ جاتىر.
