Eńbek jáne halyqty áleýmettik qorǵaý ministrligi Burger King Kazakhstan kompaniiasyna qatysty jaǵdaidy resmi túrde baqylaýǵa alǵanyn málimdedi, dep habarlaidy Dalanews.kz.
Almaty qalasynyń memlekettik eńbek inspektory Álibek Qarataidyń otbasyna arnaiy baryp, onyń ákesine resmi shaǵymdy qalai durys rásimdeý keregin túsindirip, eńbek zańnamasynda qarastyrylǵan quqyqtar men kepildikter týraly tolyq aqparat bergen.
Ministrlik taratqan málimetke sáikes, jumys berýshi – "QSR" JShS (Burger King) uiym ishinde qyzmettik tekseris júrgizip jatyr. Tergeý kezeńinde basshylardyń biri ýaqytsha qyzmetinen shettetilgen.
Al kompaniia óz tarapynan qyzmetkerdiń jumystan shyǵarylmaǵanyn atap ótti. Aitýlarynsha, jaǵdaidy beibit túrde sheshý úshin birneshe usynys jasalǵan. Sonyń ishinde qyzmetkerdi basqa meiramhanaǵa aýystyrý múmkindigi qarastyrylyp otyr. Sonymen qatar kompaniia qyzmetker men onyń otbasynyń qatysýymen ashyq dialog júrgizýge daiyn ekenin jetkizdi.
Máseleniń mán-jaiy
Aita keteiik, Qazaqstanda Burger King Kazakhstan jelisine qatysty daý áleýmettik jelidegi jazbadan keiin kúsheie tústi.
Daýdyń bastalýyna áleýmettik kásipker Janat Qarataidyń uly – aýtizm spektrindegi buzylysy bar 27 jastaǵy Álibek Qarataidyń eńbek joly týraly jazbasy sebep boldy.
Anasynyń aitýynsha, Álibek eki jasynan bastap damý erekshelikteri baiqalǵan bala. Sol kezeńde "aýtizm" uǵymy keń taramaǵandyqtan, ol balasynyń jaǵdaiyn óz betinshe zerttep, jyldar boiy pedagogika men ońaltýǵa tolyq den qoiǵan. Nátijesinde Álibek mektepti támamdap, Júrgenov atyndaǵy kolledjde bilim alyp, músinshi mamandyǵyn meńgergen. Plastilinnen animatsiialyq mýltfilmder jasaýǵa qyzyǵyp, túrli jerde jumys istep kórgen.
Aqyry ózine unaityn mamandyq pen ujymdy Burger King meiramhanasynan tapqan. Ol jerde tórt jyl boiy aspaz bolyp turaqty eńbek etip, jalaqy alyp, tapqan tabysyn óz qalaýynsha jumsap, ózin ujymnyń tolyqqandy múshesi retinde sezingen. Qajet kezde qosymsha aýysymdarǵa qalyp, demalysyn ózi josparlap, bir filialdan ekinshisine aýysyp jumys istep júrgen. Anasynyń sózinshe, bul – otbasy men meiramhana menedjerleriniń birlesken eńbeginiń nátijesi bolǵan.
Alaida jańa óńirlik basshy kelgennen keiin jaǵdai ózgergen. Janat Qarataidyń aitýynsha, sol sátten bastap ulyna jasyryn qysym kórsetile bastaǵan. Kúzden beri Álibektiń minez-qulqy ózgerip, keiin ony jumystan ketýge itermelep jatqanyn bilgen. Qazir otbasy onyń adamdarǵa degen senimin qaita qalpyna keltirýge tyrysyp jatqanyn aitqan.
Osy jazbadan keiin qoǵamda qyzý talqylaý bastaldy. Burger King Kazakhstan áleýmettik jelidegi jariialanymǵa qatysty resmi málimdeme jasap, jaǵdai otbasy úshin aýyr tigenine ókinish bildirip, teń múmkindik pen inkliýzivtilik qaǵidattaryn ustanatynyn málimdedi. Kompaniia ishki tekseris bastalǵanyn jáne Álibektiń jumystan shyǵarylmaǵanyn habarlady.
Degenmen áleýmettik jeli qoldanýshylarynyń syny kúsheiip, keibir azamattar kompaniiany boikot jariialaýǵa shaqyryp jatyr.
