مەملەكەت باسشىسى كولىك سالاسىنىڭ قىزمەتكەرلەرىن ماراپاتتادى. كەزدەسۋ بارىسىندا ءبىرقاتار ماڭىزدى جايتقا قاتىستى پىكىر ءبىلدىردى، دەپ حابارلايدى Dalanews.kz.

قاسىم-جومارت توقايەۆتىڭ پىكىرىنشە، تاعى ءبىر ماڭىزدى باعىت – ماشينا جاساۋ سەكتورى.

"الەمنىڭ ەڭ وزىق كومپانيالارىن تارتا وتىرىپ، جەرگىلىكتى ءوندىرىستى دامىتۋ وزەكتى. ءقازىر قازاقستاندا شەتەلدىك ۇزدىك كومپانيالار جۇمىس ىستەيدى. مەن جىل باسىندا استاناداعى ەلەكتروۆوز قۇراستىرۋ كاسىپورنىنا باردىم. وندا جۇك جانە جولاۋشىلار تاسىمالدايتىن ەلەكتروۆوز بەن قوسالقى بولشەكتەر شىعارىلىپ جاتىر. ەڭ باستىسى وسىنداي ماڭىزدى جۇمىستى ءوز ماماندارىمىز اتقارىپ جاتىر. مەملەكەت مۇنداي جوبالارعا جان-جاقتى قولداۋ كورسەتە بەرمەك"، – دەدى پرەزيدەنت.

مەملەكەت باسشىسى اۋە قاتىناستارىن دامىتۋ كولىك ساياساتىنداعى باسىم مىندەتتەردىڭ ءبىرى ەكەنىن اتاپ ءوتتى.

"بۇكىل ەل بويىنشا اۆياسيا ينفراقۇرىلىمىن جاڭعىرتۋ ءۇشىن كەشەندى جۇمىس جۇرگىزىلىپ جاتىر. مىسالى بىلتىر الماتى، شىمكەنت جانە قىزىلوردا قالالارىندا جاڭا تەرمينالدار ىسكە قوسىلدى. اۋەجايلاردىڭ وتكىزۋ قابىلەتى ايتارلىقتاي ارتتى. بۇرىن الماتى اۋەجايى جىلىنا 2،5 ميلليون جولاۋشىعا عانا قىزمەت كورسەتە الاتىن. بۇگىندە بۇل كورسەتكىش 14 ميلليونعا دەيىن ۇلعايدى. مەنىڭ تاپسىرماممەن زايساندا، كاتونقاراعايدا جانە كەندىرلىدە ءۇش جاڭا اۋەجاي سالىنىپ جاتىر. ارقالىق اۋەجايى قالپىنا كەلتىرىلە باستادى. مۇنداي جوبالاردىڭ جۇزەگە اسۋى جولاۋشىلار ءنوپىرىن كوبەيتىپ قانا قويمايدى، لوگيستيكا، تۋريزم، ساۋدا جانە باسقا دا قوسالقى سالالاردىڭ دامۋىنا سەرپىن بەرەدى. اۋە رەيستەرىنىڭ گەوگرافياسىن كەڭەيتۋ ماقساتىندا تۇراقتى تۇردە جۇيەلى شارالار قابىلداپ جاتىرمىز. قازىرگى كەزدە قازاقستاننىڭ 30-دان اسا ەلمەن تىكەلەي اۋە قاتىناسى بار. ءبىراق بۇل از. بۇل باعىتتاعى جۇمىس جالعاسادى"، – دەدى مەملەكەت باسشىسى.