بقو اكىمى ناريمان تورەعالييەۆتىڭ توراعالىعىمەن ينۆەستيسيا تارتۋ ماسەلەسىنە ارنالعان كەڭەس ءوتتى،- دەپ حابارلايدى Dalanews.kz

ەكونوميكانىڭ قارقىندى دامۋى ءۇشىن تەك مەملەكەتتىك قارجىعا سۇيەنۋ جەتكىلىكسىز. بۇل مەملەكەت باسشىسىنىڭ 2024 جىلعى جولداۋىندا اتاپ كورسەتىلگەن ماڭىزدى باعىتتاردىڭ ءبىرى. وسى رەتتە جەكە ينۆەستيسيالاردى تارتۋ ارقىلى ىسكەرلىك بەلسەندىلىكتى ارتتىرۋدىڭ ماڭىزدىلىعى ارتىپ كەلەدى. وبلىس اكىمى ناريمان تورەعالييەۆ بۇل ماسەلەنىڭ كۇن تارتىبىنەن تۇسپەيتىنىن ەرەكشە اتاپ ءوتتى.

“پرەزيدەنت قاسىم-جومارت توقايەۆ بىزگە ينۆەستيسيا تارتۋ بويىنشا ناقتى مىندەتتەر جۇكتەدى. 2024 جىلى جەكە ينۆەستيسيا كولەمى 538،5 ملرد تەڭگەنى قۇراپ، بۇل جالپى ينۆەستيسيا كولەمىنىڭ 75،5%-ىن (جالپى ينۆەستيسيا – 712،9 ملرد تەڭگە) قۇرادى. الداعى ۋاقىتتا جالپى قۇنى 44،5 ملرد تەڭگەنى قۇرايتىن 25 ينۆەستيسيالىق جوبانى جۇزەگە اسىرۋ جوسپارلانىپ وتىر، بۇل ءوز كەزەگىندە 769 جاڭا جۇمىس ورنىن اشۋعا مۇمكىندىك بەرەدى. سونداي-اق، 2026-2029 جىلدارى جالپى قۇنى 2،3 ترلن تەڭگەنى قۇرايتىن 34 ينۆەستيسيالىق جوبا ىسكە اسىرىلىپ، 8 مىڭنان استام جاڭا جۇمىس ورنى قۇرىلاتىن بولادى”، – دەپ اتاپ ءوتتى ءوڭىر باسشىسى.

كەڭەس بارىسىندا وسى جىلى ايماقتا ينۆەستيسيالىق جوبالاردى جۇزەگە اسىرۋدى جوسپارلاپ وتىرعان كومپانيا باسشىلارى مەن وكىلدەرى ءسوز الىپ، جوبالاردىڭ جۇزەگە اسىرىلۋ بارىسى تالقىلاندى. سونىمەن قاتار، كەزدەسۋدە ينۆەستورلار تاراپىنان كوتەرىلگەن ماسەلەلەر قارالىپ، ولاردىڭ شەشۋ جولدارى پىسىقتالدى.

وبلىس باسشىلىعى ينۆەستيسيا تارتۋ باعىتىنداعى جۇمىستاردى جۇيەلى تۇردە جالعاستىرىپ، ينۆەستورلارعا بارىنشا قولايلى جاعداي جاساۋعا ءتيىستى سالا باسشىلارىنا تاپسىرما بەردى.