مەملەكەت باسشىسى سۋ تاسقىنىنان زارداپ شەككەن تۇرعىندارعا ءتيىستى كومەك كورسەتۋدى تاپسىرعان بولاتىن.

بقو بايتەرەك اۋدانىندا 2 وتباسى جانە تەرەكتى اۋدانىندا 5 وتباسى باسپانالى بولدى.

بايتەرەك اۋدانى دوستىق اۋىلىنىڭ تۇرعىنى اقمارال سلامعالي قىزىنىڭ  باسپاناسى سۋ تاسقىنى سالدارىنان جارامسىز بولىپ قالعان. بۇگىن دە اقمارال سلامعالي قىزى جاڭا ۇيىنە قونىستاندى.

«ءۇش بولمەلى ءۇيىم سۋعا كەتكەن بولاتىن. قورقىنىشتى ۋاقىتتى باستان كەشىردىك. الايدا پرەزيدەنتتىڭ دالادا قالمايسىزدار دەگەن ءسوزى بىزگە ۇلكەن ءۇمىت بەردى. العىسىمىز شەكسىز. مىنە بۇگىن باسپانالى بولىپ وتىرمىز» - دەدى ول.

ال، تەرەكتى اۋدانىنا قاراستى پودستەپنوە اۋىلىنىڭ تۇرعىندارى دا باسپاناعا قول جەتكىزە باستادى.

جۇرگىزىلگەن تەحنيكالىق زەرتتەۋ ناتيجەسىندە پودستەپنوە اۋىلى بويىنشا 116 تۇرعىن ءۇي جارامسىز دەپ تانىلعان. قازىرگى تاڭدا 106 ءۇيدىڭ قۇرىلىسى باستالسا، 10 تۇرعىن ءۇي ساتىپ الىنۋدا.

باسپاناسى سۋدا قالعان جانداردىڭ ءبىرى – ايگۇل كەڭەسوۆا. بۇگىن ول العاشقىلاردىڭ ءبىرى بولىپ، جاڭا پاتەرىنىڭ كىلتىن الدى.

«مەن وسى اۋىلدىڭ تۇرعىنىمىن. سۋ تاسقىنى كەزىندە جالعىز ءۇيىم سۋعا كەتتى. بۇل ماسەلە كۇزگە دەيىن سوزىلىپ كەتە مە دەگەن قورقىنىش بولعان ەدى. الايدا اكىمدىك از عانا ۋاقىتتا بىزگە پاتەر ساتىپ اپەرۋگە ىقپال ەتتى. وسىلايشا بۇگىن قونىس تويىن تويلاپ جاتىرمىز. مەملەكەت باسشىسىنا العىسىمدى بىلدىرەمىن»،- دەدى ايگۇل كەڭەسوۆا.