بۇگىن ەلىمىزدە ناۋرىزناما تۇجىرىمداماسى اياسىندا- 17 ناۋرىز – شاڭىراق كۇنى اتالىپ وتۋدە.

وسى ايتۋلى كۇنگە وراي باتىس قازاقستان وبلىسىنىڭ اكىمى ناريمان تورەعالييەۆ 50، 25 جىل ءبىر شاڭىراق استىندا ءتاتۋ-تاتتى ءومىر ءسۇرىپ كەلە جاتقان مەرەيلى وتباسىلارمەن كەزدەستى.

"بارشاڭىزدى الداعى ناۋرىز مەرەكەسىمەن قۇتتىقتايمىن! اتا-بابالارىمىز «وتان وتباسىنان باستالادى» - دەپ بەكەر ايتپاعان. ادام بويىنداعى يگى قاسيەتتەر شاڭىراقتان باستاۋ الادى. وڭىرىمىزدە مەملەكەت تاراپىنان وتباسى ينستيتۋتىن نىعايتۋعا باسا نازار اۋدارىلۋدا.
قازىرگى تاڭدا وبلىس بويىنشا 14 مىڭعا جۋىق كوپبالالى انالار بار، ونىڭ ىشىندە 6 558 ايەل جاندار «التىن القا»، «كۇمىس القا»، «باتىر انا» يەگەرلەرى.

وبلىسىمىزدا ارنايى 5 «وتباسى ورتالىقتارى» جۇمىس ىستەۋدە. بيىلعى جىلى تاعى 3 اۋداندا وسىنداي ورتالىقتار اشۋدى جوسپارلاپ وتىرمىز"، - دەدى وبلىس باسشىسى.

سونداي-اق، ءوڭىر باسشىسى اتىراۋ قالاسىندا وتكەن ءۇشىنشى ۇلتتىق قۇرىلتايدا پرەزيدەنتىمىز قاسىم-جومارت كەمەل ۇلى توقايەۆ ۇلتتىڭ جاڭا كەلبەتىن ايقىندايتىن نەگىزگى قۇندىلىقتار تۋرالى ايتقانىنا توقتالدى.

“پرەزيدەنتىمىز ۇلتتىق قۇرىلتايدا اتاپ وتكەن وتانشىلدىق، بىرلىك، ىنتىماق، ادىلدىك، جاۋاپكەرشىلىك، ەڭبەكقورلىق قۇندىلىقتارى وتباسىدان باستاۋ الادى. سوندىقتان
ۇرپاق تاربيەسىنە ايرىقشا ءمان بەرۋىمىز كەرەك”- دەدى ناريمان تورەعالييەۆ.

ءىس-شاراعا سونداي-اق، جۋىردا وتاۋ قۇرعان جاس وتباسىلار دا قاتىستى.

جاستار الدىندا اعا بۋىن وكىلدەرى ءسوز سويلەپ، ومىرلىك كەڭەستەرىمەن ءبولىستى.