قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ ءىنىسى — بولات نازاربايەۆ قايتىس بولعاننان كەيىن، ونىڭ ارتىندا قالدىرعان مۇلكىنە قاتىستى نەگىزگى سۇراق — وسيەت بار ما، جوق پا — ۇزاق ۋاقىت بويى اشىق كۇيىندە بولدى. كوپشىلىك ەليتالىق جىلجىمايتىن مۇلىكتەن باستاپ، كوممەرسيالىق كومپانيالار مەن جەر تەلىمدەرىنە دەيىنگى ۇلكەن اكتيۆتەر زاڭ بويىنشا مۇراگەرلەر اراسىندا بولىنەدى دەپ توپشىلادى، دەپ حابارلايدى Dalanews.kz Orda.kz-كە سىلتەمە جاساپ.
زاڭگەر دميتريي سازونوۆ وسيەت بولعانىن جانە جالعىز رەسمي مۇراگەر رەتىندە بولات نازاربايەۆتىڭ ۇلكەن ۇلى نۇربول نازاربايەۆ كورسەتىلگەنىن مالىمدەدى.
قۇجات جۇزىندە مۇراگەر بىرەۋ بولعانىمەن، وتباسىنىڭ باسقا مۇشەلەرى دە مۇلىكتەن ۇلەس العان. مىسالى، بولات نازاربايەۆقا تيەسىلى ۇيلەردىڭ ءبىرى رەسمي تۇردە 38 ۇلەسكە بولىنگەن. ونىڭ ىشىندە 25 ۇلەس نۇربولعا بەرىلسە، قالعان 13 ۇلەس تۋىستارى اراسىندا ۇلەستىرىلگەن.
قاي ءۇي بولىنگەنى ناقتى بەلگىسىز، ءبىراق جۋرناليستەر ءتورت ىقتيمال نىساندى اتاپ وتەدى:
▪️ №1 ءۇي – الماتى قالاسى، گورنايا كوشەسى. فۋتبول الاڭى، جىلىجايى مەن ءزاۋلىم سارايى بار يەلىك.
▪️ №2 ءۇي – الماتى قالاسى، ونداسىنوۆ كوشەسى. ورمانمەن قورشالعان، سىرتقى كەلبەتى سارايدى ەسكە تۇسىرەدى.
▪️ №3 ءۇي – الماتى وبلىسى، قاراساي اۋدانى، شامالعان اۋىلى. تاۋدىڭ ەتەگىندەگى ەكى قاباتتى ءۇي جانە قوسىمشا قۇرىلىستار.
▪️ №4 ءۇي – شامالعانداعى تاعى ءبىر يەلىك.
نۇربول نازاربايەۆقا الماتىداعى مۇلىكتەر دە بۇيىردى
جۋرناليستەردىڭ مالىمەتىنشە، وسيەتكە سايكەس، نۇربول نازاربايەۆقا الماتىداعى جىلجىمايتىن مۇلىك تە بەرىلگەن، ونىڭ ىشىندە BNC Plaza تۇرعىن ءۇي كەشەنىندەگى پاتەر بار. ايتا كەتەيىك، بۇل كەشەن بۇرىننان نۇربول نازاربايەۆقا توو «PrimeCapital Re Plaza» كومپانياسى ارقىلى تيەسىلى بولعان، ال كومپانيانىڭ ءوزى وعان اكەسىنىڭ كوزى تىرىسىندە-اق وتكەن.
بۇعان دەيىن بولات نازاربايەۆ قايتىس بولعان سوڭ ونىڭ تۋىستارى مۇراگەرلىك قۇقىق الۋ ءۇشىن ءوتىنىش بىلدىرگەنى حابارلانعان. ولار ورتاق مۇلىك پەن زاڭ بويىنشا تيەسىلى مىندەتتى ۇلەسكە ۇمىتكەر ەكەنىن مالىمدەگەن.
وسيەت بويىنشا مۇرا الۋ تۋرالى نۇربول نازاربايەۆ پەن بولات نازاربايەۆتىڭ جارى دينارا نازاربايەۆا ءوتىنىش جاساعان. دينارا حانىم ورتاق نەكەدە جينالعان مۇلىكتىڭ جارتىسىنا ۇمىتكەر ەكەنىن كورسەتكەن. سونىمەن قاتار، بولات نازاربايەۆتىڭ 13 بالاسى زاڭ بويىنشا مىندەتتى مۇرا ۇلەسىنە قۇقىق الۋ ماقساتىندا ءوتىنىش تۇسىرگەن.
