باسقوسۋدا قوس تاراپ ءوزارا ىنتىماقتاستىق جانە الەۋمەتتىك مىندەتتەردى جۇزەگە اسىرۋعا باعىتتالعان ەكى جاقتى ارەكەتتەستىك مۇمكىندىكتەر جايىن اڭگىمەلەدى. مۇنىمەن قوسا، باسقوسۋدا تۇرعىنداردىڭ قارجىلىق ساۋاتتىلىعىن ارتتىرۋ جانە ولاردى جيناقتاۋشى زەينەتاقى جۇيەسىنە تارتۋ مەن زەينەتاقى جۇيەسىن جاڭعىرتۋ ماسەلەلەرى بويىنشا اقپارات بەرۋ تاقىرىپتارى كوتەرىلدى.
كەزدەسۋدىڭ ناتيجەسى بويىنشا «ءبىرىڭعاي جيناقتاۋشى زەينەتاقى قورى» اكسيونەرلىك قوعامى مەن وڭتۇستىك قازاقستان وبلىسى اكىمدىگى اراسىندا ىنتىماقتاستىق جانە ءوزارا ارەكەتتىستىك تۋرالى مەموراندۋمعا قول قويدى.
مەموراندۋم اياسىندا حالىقتىڭ جيناقتاۋشى زەينەتاقى جۇيەسىنە دەگەن قارجىلىق ساۋاتتىلىعىن ارتتىرۋ، قارجى كولەمىن ۇلعايتۋ جانە تۇسەتىن مىندەتتى زەينەتاقى جارنالارىنىڭ تۇراقتىلىعىن باقىلاۋ، سونداي-اق، زەينەتاقى جۇيەسىن جاڭعىرتۋ بويىنشا اقپاراتتاندىرۋ جۇمىستارى جۇرگىزىلمەك.
ءوز كەزەگىندە وبلىس اكىمدىگى بجزق-نىڭ مەملەكەتتىك جانە باسقا دا ۇيىمداردا تۇرعىندارعا اقپارات بەرۋگە ارنالعان شارالارىن وتكىزۋگە كومەك كورسەتەدى جانە قاجەت بولعان جاعدايدا ولارعا قاتىساتىن بولادى.
ايتا كەتەيىك، بۇگىندە وبلىس بويىنشا ورتاشا زەينەتاقى جيناقتارىنىڭ كولەمى 486 مىڭ تەڭگەنى قۇرادى. 2016 جىلى وبلىس تۇرعىندارىنىڭ جاساعان ورتاشا ناقتى مىندەتتى زەينەتاقى جارنالارىنىڭ (مزج) سوماسى 6 478 تەڭگە بولدى. قازىرگى تاڭدا بۇكىل رەسپۋبليكا بويىنشا بجزق-نىڭ 231 دەربەس قىزمەت كورسەتۋ ورتالىقتارى جۇمىس ىستەسە، وڭتۇستىكتە 20 بولىمشە حالىققا قىزمەت كورسەتۋدە. ولاردا وتكەن جىلى 455،7 مىڭنان استام قىزمەت كورسەتىلدى.
وقو اكىمىنىڭ باسپا ءسوز قىزمەتى
