جۋىردا قارجىلىق مونيتورينگ اگەنتتىگى جالعان ستوماتولوگيالىق كلينيكالاردىڭ يەلەرىن ىزدەستىرىپ جاتقانىن مالىمدەدى. الەۋمەتتىك جەلىدە قما ىزدەگەن ادامنىڭ ءبىرى ۇندەۋ جاسادى، دەپ حابارلايدى Dalanews.kz.
ءمان-جايى
اگەنتتىك مالىمەتىنشە، مىنا ادامدار ىزدەستىرىلىپ جاتىر:
- دۇيسەنوۆ اسلان قامبار ۇلى، 01.04.1992 ج.ت.
- يمانبايەۆ گابباس، 18.05.1998 ج.ت.
- ەلەشيەۆ ەسىمحان باياندييەۆيچ، 11.09.1987 ج.ت.
"ولار 46 ملرد تەڭگەدەن اسا قاراجاتتى بجزق-دان زاڭسىز شىعارۋ ماقساتىندا قىلمىستىق سحەمالار ۇيىمداستىردى دەگەن كۇدىككە ىلىنگەن. بۇل ماقساتتا ولار ءتىس ەمدەۋ قىزمەتى كورسەتىلگەندەي جالعان مەديسينالىق قۇجاتتار راسىمدەگەن. ولار ماڭعىستاۋ جانە اتىراۋ وبلىستارىنداعى 7 ستوماتولوگيالىق كلينيكانى پايدالانعان. بۇل مەكەمەلەر ءىس جۇزىندە ەشقانداي مەديسينالىق قىزمەت كورسەتپەگەن"، - دەپ جازىلعان بۇعان دەيىنگى حابارلامادا.
ولارعا قاتىستى بۇلتارتپاۋ شاراسى رەتىندە قاماۋعا الۋ قولدانىلعان.
"ايىپتالۋشىلاردىڭ ءبىرى، ياعني دۇيسەنوۆ ا.ق. بۇرىن پوليسيا قىزمەتكەرى بولعان، الايدا تەرىس سەبەپتەر بويىنشا جۇمىستان شىعارىلعان. 2016 جىلى ول قىلمىستىق كودەكستىڭ 105-بابى ("وز-وزىنە قول جۇمساۋعا دەيىن جەتكىزۋ") جانە 362-بابى ("قىزمەتتىك وكىلەتتىكتەرىن اسىرا پايدالانۋ") بويىنشا اۋىر قىلمىس جاساعانى ءۇشىن 5 جىلعا باس بوستاندىعىنان ايىرىلعان"، - دەدى قما وكىلى بۇعان دەيىن.
جەلىدەگى ۇندەۋ
Instagram-داعى atyrauoil.official پاراقشاسىندا اتىراۋلىق اسلان دۇيسەنوۆتىڭ ۇندەۋى جاريالاندى. اسلان دۇيسەنوۆتىڭ سوزىنە سەنسەك، بۇل ىستە ەشقانداي الاياقتىق جوق،ستوماتولوگيا زاڭدى تۇردە جۇمىس ىستەگەن.
"ەشكىمدى الداپ، اقىسىن جەگەن ەمەسپىز. رەسمي ستوماتولوگيا جۇمىس ىستەدى. 46 ملرد دەگەن وتىرىكتەۋ، 46 ملرد بولعان جوق. ءوزىمنىڭ شوتىمداعى اينالىم كورىنىپ تۇر. ونىڭ الدىندا ءبىر كاسىپكەردەن ساتىپ العانمىن، زاڭ جۇزىندە ليسەنزيامىز - ءبارى بار، ماماندار جۇمىس ىستەپ كەلدى. قما تاراپىنان تەكسەرىس جۇرگىزىلىپ، ستوماتولوگيا توقتاپ تۇر. وعان دەيىن ءوز تاراپىمىزدان رەسمي جۇمىس ىستەدىك"، - دەدى ول.
