تالعاردىڭ ازات اۋىلىندا قازا تاپقان شەرزات بولاتتىڭ اكەسى قارجاۋباي نۇرىموۆ قازاق حالقىنا ۇندەۋ جاساپ، جاعدايعا سابىرمەن قاراۋعا شاقىردى. ول بيلىك ورگاندارىنىڭ وقيعاعا بايلانىستى جۇمىس ىستەپ جاتقانىن ايتىپ، كىنالىلەردىڭ ءادىل سوت الدىندا جاۋاپ بەرەتىنىنە ءۇمىت ارتتى، دەپ حابارلايدى Dalanews.kz.
«قازاق ەلىنە ايتارىم – بىزگە قانتوگىس كەرەك ەمەس. قۇزىرلى ورگاندار ءىستى ءوز باقىلاۋىنا الدى، بارلىعى زاڭ اياسىندا شەشىلەدى دەپ سەنەمىن. مەن ەشكىمنەن قورىقپايمىن، كىم كەلسە دە جاۋاپ بەرە الامىن. ەڭ باستىسى، تىنىش جاتقان ەلدە دۇربەلەڭ تۋماسا ەكەن. ادىلەتتى قازاقستان قۇرامىز دەسەك، ءبىر قازاق ەكىنشى قازاققا قارۋ كەزەنبەۋى كەرەك»، – دەدى نۇرىموۆ.
ايتا كەتەيىك، 12 قازانعا قاراعان ءتۇنى تالعار تراگەدياسىندا قازا تاپقان شەرزات بولاتتىڭ ءۇيى ورتەنىپ كەتتى. بۇل تۋرالى الەۋمەتتىك جەلىدە حابارلانا باستادى.
بۇل دەرەككە پوليسيا دەپارتامەنتى جاۋاپ بەردى. 12 قازانعا قاراعان ءتۇنى ەڭبەكشىقازاق اۋدانى ازات اۋىلىنداعى ۇيلەردىڭ بىرىندە ءورت بولدى.
پوليسيا بوتەننىڭ مۇلكىن قاساقانا جويۋ دەرەگى بويىنشا قىلمىستىق ءىس قوزعادى.
تەرگەۋ اياسىندا كۋاگەرلەردەن جاۋاپ الىنىپ جاتىر، سونداي-اق بەينەباقىلاۋ كامەرالارىنىڭ جازبالارى زەرتتەلىپ جاتىر.
ارتىنشا شەرزات بولاتتىڭ وتباسىن پوليسيا كۇزەتەتىنى بەلگىلى بولدى.
بۇگىن، 12 قازاندا باس پروكۋراتۋرانىڭ باسشىلىعىمەن قىلمىستى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلدى.
كىنالىلەردى اشكەرەلەۋ ءۇشىن بارلىق شارالار قابىلداناتىن بولادى. قىلمىستىق iس قازاقستان رەسپۋبليكاسى باس پروكۋرورىنىڭ باقىلاۋىنا الىندى.
