قازاقستان رەسپۋبليكاسىنىڭ دەنساۋلىق ساقتاۋ ءمينيسترى ەلجان ءبىرتانوۆ شىعىس قازاقستان وبلىسىنىڭ مەديسينا قىزمەتكەرلەرىنە COVID-19 دەرتىمەن قارسى كۇرەستە بەلسەندى قاتىسقاندارى ءۇشىن مەدالدار مەن العىس حاتتار تابىس ەتتى.
"بۇگىن وسكەمەندىك ارىپتەستەرىمىزگە پاندەميامەن كۇرەستە تانىتقان ەرلىكتەرى بەن قاجىرلى ەڭبەكتەرىنە العىس بىلدىرەمىز. مەملەكەت باسشىسى ايتقانداي، پاندەميا ءالى تولىقتاي اياقتالعان جوق.
دەگەنمەن، ءبىراز السىرەپ، ءبىز دە ايماقتارعا شىعىپ، ارىپتەستەرىمىزدىڭ ەڭبەگىن اتاپ ءوتىپ، كەزدەسۋ مۇمكىندىگىنە يە بولدىق.
بۇگىنگى تاڭدا شىعىس قازاقستان وبلىسىندا كوروناۆيرۋس دەڭگەيى ايتارلىقتاي تومەن، بۇل وبلىس دارىگەرلەرىنىڭ ەڭبەگى"، - دەدى ەلجان ءبىرتانوۆ ءوز سوزىندە.
شىعىس قازاقستان وبلىسىندا كوروناۆيرۋسپەن كۇرەس جولدارى ءالى جالعاسىپ كەلەدى. ءوڭىر دارىگەرلەرى وپەراتيۆتى تۇردە ەڭبەك ەتىپ، تاۋلىك بويى كەزەكشىلىكتە.
ەڭبەكتەرىنىڭ ەلەنىپ، العىسقا يە بولۋلارى بويلارىنا قۋات بەرمەك. وسى رەتتە، «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسى ايماقتىق فيزيوپۋلمولوگيالىق ورتالىعىنىڭ انەستەزيولوگ-رەانيماتولوگى ورالبەك ابىلماجىنوۆكە بەرىلدى. اتالمىش ورتالىقتىڭ مەدبيكەسى نازىم يگيسينوۆا مەن انا مەن بالا ورتالىعىنىڭ مەيىربيكەسى سابيرا سەكسەنبايەۆا مينيسترلىكتىڭ العىس حاتىنا يە بولدى.
- ەكى اي بۇرىن فتيزيوپۋلمونولوگيالىق ورتالىقتا كارانتين ءبولىمى اشىلدى، مەن وسى بولىمدە جۇمىس ىستەدىم. مەنىڭ بارلىق ارىپتەستەرىم دەرتپەن كۇرەستە جوعارى بەلسەندىلىك تانىتىپ كەلەدى. جۇمىس ءالى جالعاسۋدا، - دەدى ماراپات يەسى ورالبەك ءابىلماجىنوۆ.
