بۇگىن مەملەكەت باسشىسى قاسىم-جومارت توقايەۆ قازاقستان حالقىنا جولداۋىن جاريالادى. وسى تۇستا الماتى قالالىق جاستار رۋحى جاستار قاناتىنىڭ ءتوراعاسى اكەجان كەڭەسوۆ اتالعان بىرنەشە ماسەلەگە بايلانىستى پىكىرىن ءبىلدىردى، دەپ حابارلايدى Dalanews.kz.
“پرەزيدەنت قاسىم-جومارت توقايەۆتىڭ جولداۋىندا ەل دامۋىنىڭ باسىم باعىتتارى رەتىندە ەكونوميكا، عىلىم جانە جوعارى ءبىلىم سالالارى ەرەكشە اتالدى. بۇلاردىڭ ءارقايسى ەل بولاشاعى ءۇشىن اسا ماڭىزدى، سونداي-اق مۇندا جاستاردىڭ ءرولى زور دەپ ەسەپتەيمىن.
مەملەكەت باسشىسى اتاپ وتكەندەي، قازاقستاننىڭ ەكونوميكالىق دامۋىنىڭ باستى ماقساتى – ازاماتتاردىڭ تابىس دەڭگەيىن ارتتىرۋ. بۇل ماقساتقا جەتۋ ءۇشىن ەكونوميكانى ءارتاراپتاندىرۋ، شاعىن جانە ورتا بيزنەستى دامىتۋ، ينۆەستيسيالىق احۋالدى جاقسارتۋ ماڭىزدى. وسى باعىتتاردا جاستاردىڭ بەلسەندىلىگى شەشۋشى ءرول اتقارۋى ءتيىس. جاستاردىڭ كاسىپكەرلىككە دەگەن قىزىعۋشىلىعىن ارتتىرۋ ءۇشىن ارنايى باعدارلامالار ۇيىمداستىرۋ قاجەت"،- دەيدى ول.
ايتۋىنشا، ستارتاپ-بايقاۋلار، كاسىپكەرلىككە ۇيرەتۋ كۋرستارى جانە تالىمگەرلىك باعدارلامالار ارقىلى جاستاردى بيزنەستە جاڭا يدەيالاردى جۇزەگە اسىرۋعا ىنتالاندىرۋعا بولادى.
“وسى باعىتتار بويىنشا جاس كاسىپكەرلەر ەلدىڭ ەكونوميكالىق وسىمىنە ءوز ۇلەسىن قوسىپ، جاڭا جۇمىس ورىندارىن اشىپ، قوعامداعى الەۋمەتتىك تەڭسىزدىكتى تومەندەتۋگە ىقپال ەتەدى”، - دەپ اتاپ ءوتتى كەڭەسوۆ.
سونىمەن قاتار سيفرلاندىرۋ مەن يننوۆاسيالاردى ەكونوميكانىڭ بارلىق سالاسىنا ەنگىزۋ قاجەتتىلىگى دە ماڭىزدى ەكەنىن جەتكىزدى.
“IT سالاسىندا ءبىلىم الىپ جاتقان جاستارعا تاجىريبە الماسۋ، ستارتاپتار قۇرۋ جانە يننوۆاسيالىق جوبالاردى ىسكە اسىرۋ مۇمكىندىكتەرىن ۇسىنۋ ماڭىزدى. سيفرلىق ەكونوميكادا جەتىستىككە جەتۋ ءۇشىن جاستاردىڭ جاڭا تەحنولوگيالاردى مەڭگەرۋى جانە ولاردى وندىرىستە، قىزمەت كورسەتۋ سالاسىندا جانە كۇندەلىكتى ومىردە قولدانۋى ماڭىزدى.
پرەزيدەنت عىلىمدى دامىتۋعا ەرەكشە نازار اۋدارىپ، ەلىمىزدە يننوۆاسيالىق ەكوجۇيە قۇرۋ قاجەتتىگىن ايتتى. مىسالى، ستۋدەنتتەر مەن جاس عالىمدار اراسىندا عىلىمي جوبالار بايقاۋلارىن ۇيىمداستىرۋ، تاجىريبە الماسۋ باعدارلامالارىن دامىتۋ، شەتەلدىك جەتەكشى عالىمدارمەن ىنتىماقتاستىقتى نىعايتۋ سياقتى شارالار ارقىلى جاستاردىڭ عىلىمعا دەگەن قىزىعۋشىلىعىن ارتتىرۋعا بولادى. سونداي-اق، عىلىم مەن ءوندىرىس اراسىنداعى بايلانىستى كۇشەيتۋ قاجەت. عىلىمي جاڭالىقتاردى وندىرىسكە ەنگىزۋگە ىقپال ەتۋ ماڭىزدى. بۇل ءۇشىن ۋنيۆەرسيتەتتەردە ستارتاپتار قۇرۋعا، عىلىمي-تەحنولوگيالىق پاركتەر اشۋعا جانە وندىرىستىك كاسىپورىندارمەن تىعىز بايلانىس ورناتۋعا جاعداي جاساۋ ماڭىزدى. وسى ارقىلى جاس عالىمدار وزدەرىنىڭ عىلىمي جاڭالىقتارىن ناقتى ونىمگە اينالدىرىپ، ەكونوميكانىڭ دامۋىنا ۇلەس قوسا الادى”، - دەيدى كەڭەسوۆ.
ونىڭ سوزىنشە، جوعارى ءبىلىم سالاسى – ەلىمىزدىڭ زياتكەرلىك الەۋەتىن ارتتىرۋدىڭ نەگىزگى كوزى.
“پرەزيدەنت جوعارى وقۋ ورىندارىن ينتەرناسيونالداندىرۋ، ولاردىڭ ساپاسىن ارتتىرۋ جانە ناقتى ەكونوميكامەن بايلانىستى كۇشەيتۋ قاجەتتىگىن اتاپ ءوتتى. ستۋدەنتتەر مەن جاس مامانداردى جۇمىسقا ورنالاستىرۋ، ولاردى ناقتى ءوندىرىس ورىندارىنا تاعىلىمداماعا جىبەرۋ جانە ولاردىڭ ءبىلىمىن پراكتيكادا قولدانۋعا مۇمكىندىك بەرۋ باعىتىندا بەلسەندىلىك تانىتۋ قاجەت.
جوعارى ءبىلىمنىڭ ساپاسىن ارتتىرۋ ءۇشىن وقۋ باعدارلامالارىن زاماناۋي تالاپتارعا سايكەستەندىرۋ، حالىقارالىق ستاندارتتارعا ساي ءبىلىم بەرۋ جانە شەتەلدىك جوعارى وقۋ ورىندارىمەن ىنتىماقتاستىقتى كۇشەيتۋ ماڭىزدى. ستۋدەنتتەر اراسىندا شەتەلدىك تاجىريبە الماسۋ باعدارلامالارىن ناسيحاتتاۋ، شەتەلدىك پروفەسسورلار مەن مامانداردى قازاقستاندىق جوعارى وقۋ ورىندارىنا شاقىرۋ ارقىلى ءبىلىم ساپاسىن ارتتىرۋعا ىقپال ەتۋ قاجەت.
بۇل ەلىمىزدىڭ ەكونوميكالىق جانە الەۋمەتتىك دامۋىنىڭ ماڭىزدى فاكتورىنا اينالاتىنى ءسوزسىز.
قورىتىندىلاي كەلە، ەلىمىزدىڭ بولاشاعى ءۇشىن تۇراقتى دامۋ مەن وركەندەۋگە باعىتتالعان جۇيەلى قادامدار جاساۋ اسا ماڭىزدى. بىرلەسە اتقارىلعان جۇمىس پەن العا قويعان ماقساتتارعا ادالدىق – جارقىن بولاشاقتىڭ كەپىلى بولماق”، - دەيدى ول.
