ۇكىمەت وتىرىسىندا ۋاقىت بەلدەۋى ماسەلەسىنە نازار اۋدارىلدى. ساۋدا جانە ينتەگراسيا ءمينيسترى ارمان شاققالييەۆ ءبىرىڭعاي ۋاقىت بەلدەۋىنە كوشۋىنىڭ حالىق دەنساۋلىعىنا پراكتيكالىق اسەرىن زەرتتەۋ ناتيجەلەرى تۋرالى باياندادى، دەپ حابارلايدى Dalanews.kz.
مينيستر «AMANAT» فراكسياسىندا وتكەن تالقىلاۋدىڭ قورىتىندىسى بويىنشا حالىق دەنساۋلىعىنا، ەنەرگيا تۇتىنۋعا جانە ەڭبەك ونىمدىلىگىنە ءبىرىڭعاي ۋاقىت بەلدەۋىنىڭ اسەرىن باعالاۋ ماقساتىندا مونيتورينگ جۇرگىزىلگەنىن اتاپ ءوتتى. بۇل جۇمىسقا مەديسينا، نەيروعىلىم، بيوفيزيكا، گەنەتيكا، استروفيزيكا، فيزيولوگيا سالاسىنداعى عىلىمي-زەرتتەۋ ينستيتۋتتارى، ءماسليحات دەپۋتاتتارى جانە مۇددەلى تاراپتار تارتىلدى.
زەرتتەۋ بارىسىندا مالىمەتتەردى تالداۋ، ساۋالناما ناتيجەلەرى مەن ءبىرىڭعاي ۋاقىت بەلدەۋىنە دەيىنگى جانە كەيىنگى كورسەتكىشتەردى سالىستىرۋدى قامتيتىن كەشەندى ءادىس قولدانىلدى. زەرتتەۋ ادىستەمەسى حالىق دەنساۋلىعى، ەنەرگيا تۇتىنۋ، ەڭبەك ونىمدىلىگى، وقۋشىلاردىڭ ۇلگەرىمى، جول-كولىك وقيعالارى، قىلمىس دەڭگەيى جانە باسقا دا اسپەكتىلەر بويىنشا 40-تان استام كورسەتكىشتى قامتيدى.
«دەنساۋلىق ساقتاۋ بويىنشا ءارتۇرلى جاس توپتارى، سونداي-اق قالا جانە اۋىل تۇرعىندارى قامتىلدى، ەسەپ 100 مىڭ ادامعا شاققانداعى كورسەتكىشتەر نەگىزىندە جۇرگىزىلدى. ەنەرگيا تۇتىنۋ بويىنشا ەلەكتر ەنەرگياسىن پايدالانۋ ستاتيستيكاسى، ونىڭ ىشىندە ەڭ جوعارى جۇكتەمەلەر جانە ەل بويىنشا تۇتىنۋ كولەمى سالىستىرىلدى. ەڭبەك قىزمەتى تۇرعىسىنان ورىندالعان جۇمىس كولەمى، كەشىگۋلەر مەن جۇمىستان قالۋ جاعدايلارى، جاراقات الۋ مەن ءتارتىپ بۇزۋشىلىقتار ەسەپكە الىندى.
ناتيجەسىندە ءبىرىڭعاي ۋاقىت بەلدەۋىنە كوشۋ حالىقتىڭ نەگىزگى ءومىر ءسۇرۋ كورسەتكىشتەرىنە تەرىس اسەر ەتپەگەنىن كورسەتىپ وتىر» دەپ ءتۇسىندىردى ارمان شاققالييەۆ.
ولجاس بەكتەنوۆ پرەزيدەنت ۇكىمەت پەن پارلامەنتكە بۇل ماسەلەنى كونسترۋكتيۆتى تۇردە قاراستىرۋدى تاپسىرعانىن ايتتى.
«وزدەرىڭىز بىلەسىزدەر، مەملەكەت باسشىسى ۇكىمەت پەن پارلامەنتكە بۇل ماسەلەنى كونسترۋكتيۆتى تۇردە قاراستىرىپ، بىرلەسكەن ءارى سالماقتى شەشىم قابىلداۋدى تاپسىردى. مينيستر بايانداماسىندا اتاپ وتكەندەي، مونيتورينگ ناتيجەلەرى ءبىرىڭعاي ۋاقىت بەلدەۋىن ەنگىزۋ تۋرالى قابىلدانعان شەشىمنىڭ تەرىس اسەرى بولماعانىن كورسەتتى»،دەدى ولجاس بەكتەنوۆ.
ول ماجىلىسپەن بىرلەسىپ ءتيىستى جۇمىستار جۇرگىزۋدى تاپسىردى.
