شىمكەنت قالالىق ءبىلىم باسقارماسىنا قاراستى №90 دارىندى بالالارعا ارنالعان مامانداندىرىلعان مەكتەپ-گيمنازياسى مەملەكەتتىك ساتىپ الۋ جوسپارىندا 2،7 ملن بيۋدجەت قاراجاتىنا 20 دوپ الماقشى بولعان.
تاۋاردىڭ ءاربىر بىرلىگى 2-دەن 10 ەسەگە دەيىن اسىرا باعالانىپ كورسەتىلىپتى.
– مەملەكەتتىك مەكەمە باسكەتبول دوبىن 232 مىڭ تەڭگەگە، ال ۆولەيبول دوبىن 42 مىڭ تەڭگەگە ساتىپ الۋدى جوسپارلاعان، – دەدى ق ر سىبايلاس جەمقورلىققا قارسى ءىس-قيمىل اگەنتتىگىنىڭ شىمكەنت قالاسى بويىنشا دەپارتامەنتىنىڭ باسشىسى داۋرەن ەرعارين ءوزىنىڭ فەيسبۋكتاعى پاراقشاسىندا.
بۇدان كەيىن دەپارتامەنت قىزمەتكەرلەرى مەملەكەتتىك ساتىپ الۋدى ۇيىمداستىرۋشىنىڭ اتىنا جوسپاردىڭ تارماعىن قايتا قاراۋ تۋرالى ۇسىنىس حات جولدادى. ناتيجەسىندە 2،2 ملن تەڭگەدەن استام قارجى ۇنەمدەلدى.
– ايتا كەتەيىك، بيۋدجەت قاراجاتىن ۇنەمدەۋ ماقساتىندا سىبايلاس جەمقورلىققا قارسى قىزمەت ساتىپ الۋ نارىعىنىڭ اشىقتىعى مەن قولجەتىمدىلىگىن ارتتىراتىن «ءبىرىڭعاي ساتىپ الۋ تەرەزەسى» ۆەب-پورتالىنا ۇنەمى مونيتورينگ جۇرگىزەدى، – دەدى داۋرەن ەرعارين.
