2024 جىلى قازاقستاننان سىرتقا كوشىپ كەتكەندەر سانى بەلگىلى بولدى، دەپ حابارلايدى Dalanews.kz.

2024 جىلى قازاقستانعا تۇراقتى تۇرۋعا 29 282 ادام كەلسە، ەلدەن كەتكەندەر سانى – 12 732 ادام. كوشى-قون سالدوسى 16 550 ادامدى قۇرادى. وسىلايشا، قاتارىنان ەكى جىل بويى سىرتقى كوشى-قوننىڭ وڭ سالدوسى بايقالىپ وتىر.

"ەلدىڭ نەگىزگى كوشى-قون الماسۋى تمد مەملەكەتتەرىمەن جۇرگەن. تاۋەلسىز مەملەكەتتەر دوستاستىعىنان كەلگەندەردىڭ ۇلەسى 81،6% بولسا، وسى ەلدەرگە كەتكەندەردىڭ ۇلەسى 74،8% قۇرادى. باسقا ەلدەردىڭ ىشىندە كوشىپ كەلگەندەردىڭ كوپشىلىگى قىتايدان، موڭعوليادان جانە تۇركيادان بولعان، ال باسقا ەلگە كەتكەندەردىڭ باسىم بولىگى گەرمانيا، پولشا جانە اقش-قا كەتكەن"، - دەپ جازىلعان حابارلامادا.

شەتەلدەن تۇراقتى تۇرۋ ءۇشىن كەلگەندەر نەگىزىنەن الماتى قالاسىن (6 260 ادام)، سونداي-اق الماتى (4 788) جانە ماڭعىستاۋ (3 680) وبلىستارىن تاڭداعان. كەرىسىنشە سىرتقا كەتكەندەردىڭ ەڭ كوپ سانى سولتۇستىك قازاقستان (2 133 ادام)، قاراعاندى (1 588) جانە شىعىس قازاقستان (1 195) وبلىستارىندا تىركەلگەن.

ەل ىشىندە كوشىپ-قونۋشىلار سانى 2023 جىلمەن سالىستىرعاندا 47،6% ءوستى. ءوڭىرارالىق كوشى-قون بويىنشا ەلىمىزدىڭ 4 وڭىرىندە وڭ سالدو قالىپتاسىپ وتىر، ولار استانا (73 238 ادام)، الماتى (36 061 ادام)، شىمكەنت (9 361 ادام) قالالارى مەن الماتى وبلىسى (2639 ادام).