سىبايلاس جەمقورلىققا قارسى قىزمەت قوستاناي مەن اقمولا وبلىستارىندا مامانداندىرىلعان حالىققا قىزمەت كورسەتۋ ورتالىقتارىنىڭ زاڭعا قايشى ارەكەتىن انىقتادى.

قىزمەتكەرلەر جول ەرەجەلەرى تۋرالى تەوريالىق ەمتيحان تاپسىرماعان ازاماتتارعا سىناقتان ءساتتى وتكەنى تۋرالى بلانكىلەردى ساتىپ كەلگەن.

ولاردىڭ ورنىنا ەمتيحاندى ارنايى دايىندالعان جالعان تۇلعالار تاپسىرعان.

ماسەلەن، اقمولا وبلىسىندا ەمتيحان قاشىقتان ۇيىمداستىرىلسا، قوستاناي وبلىسىندا بەتپەردە مەن كەپكە كيگەن جالعان تۇلعالار تەستى ەمتيحان سىنىبىندا وتىرىپ تاپسىرعان.

جەمقورلىققا قارسى اگەنتتىكتىڭ مالىمەتىنشە، تەرگەۋ بارىسىندا مىڭنان اسا جۇرگىزۋشى كۋالىگىن زاڭسىز بەرۋ فاكتىلەرى تەكسەرىلىپ جاتىر. جول قوزعالىسى ەرەجەلەرى تۋرالى تەوريالىق ەمتيحاندى ءساتتى تاپسىرعانى جايلى جالعان ەمتيحان انىقتامالارى تاركىلەندى.

"مۇنداي قىلمىس ادامداردىڭ ءومىرى مەن دەنساۋلىعىنا، مۇلكىنە تىكەلەي ءقاۋىپ توندىرەدى"، - دەپ ەسكەرتتى اگەنتتىك.

مىسالى، قوستانايدا م. ەسىمدى ازامات جول ەرەجەسىن ورەسكەل بۇزىپ، Toyota سamry كولىگىمەن سوقتىعىسقان. جول اپاتى سالدارىنان اۆتوكولىكتەرگە قاتتى زاقىم كەلدى. تەرگەۋ نۇسقاسى بويىنشا م. ەسىمدى ازامات تەوريالىق جانە پراكتيكالىق ەمتيحانداردى تاپسىرماي جۇرگىزۋشى كۋالىگىن العان.

"اۋقىمدى زاڭبۇزۋشىلىقتاردىڭ انىقتالۋىنا بايلانىستى ەلدەگى بارلىق مامانداندىرىلعان حالىققا قىزمەت كورسەتۋ ورتالىعىندا تەكسەرىس جۇرگىزىلەدى"، - دەدى اگەنتتىكتەگىلەر.