جەتىسۋ وبلىسىنىڭ اكىمى بەيبىت يسابايەۆ ينۆەستورلارمەن كەزدەسۋ وتكىزدى. كەزدەسۋ بارىسىندا تاراپتار ينۆەستيسيالىق ىنتىماقتاستىقتىڭ، سونىڭ ىشىندە اگروونەركاسىپتىك كەشەن سالاسىنىڭ ينۆەستيسيالىق مۇمكىندىكتەرى مەن الەۋەتى تۋرالى ماسەلەنى تالقىلادى،- دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

قىتايلىق سەرىكتەستەردىڭ قاتىسۋىمەن وڭىردە ءبىرقاتار جوبالار ىسكە اسىرىلىپ جاتقانىن ايتقان وبلىس اكىمى اگرارلىق باعىتتاعى جەتىسۋ وبلىسى ءۇشىن اۋىل شارۋاشىلىعى ونىمدەرىن تەرەڭ وڭدەۋ بويىنشا ىنتىماقتاستىقتى دامىتۋدىڭ ماڭىزدىلىعىن اتاپ ءوتتى.

ءوز كەزەگىندە «Qingdao Wanlin Food Co.، Ltd» ينۆەستور كومپانيانىڭ قۇرىلتايشىسى ءارى باس ديرەكتورى لي يانتاو ءوز كومپانياسىنىڭ ەكى باعىتتا، ياعني پياز، سارىمساق، ءسابىز، كارتوپ سياقتى اۋىل شارۋاشىلىعى ونىمدەرىن وڭدەۋ جانە قايتالاي وڭدەۋمەن اينالىساتىنىن جەتكىزدى. بۇل رەتتە پياز ءوسىرۋ ءۇشىن قولايلى تابيعي-كليماتتىق جاعدايلاردى ەسكەرە وتىرىپ، ينۆەستور ءوڭىر اۋماعىندا وسى داقىلدى وڭدەۋ زاۋىتىن سالۋ تۋرالى ۇسىنىسىن ءبىلدىردى.

پەرسپەكتيۆالى جوبانى ىسكە اسىرۋ جولدارىن تالقىلاي كەلە، تاراپتار كاسىپورىندى وبلىس اۋماعىندا ورنالاستىرۋ مۇمكىندىگىن قاراستىرۋ جايىن كەلىستى. زاۋىتقا كەرەكتى شيكىزاتقا كەلسەك، وبلىس اكىمى بۇعان قاتىستى ءبىرىنشى كەزەكتە جەرگىلىكتى شارۋاشىلىقتارمەن ىنتىماقتاستىق ورناتۋدىڭ ماڭىزدىلىعىن اتاپ ءوتتى.

"ءبىز ءوز تاراپىمىزدان زاۋىتتى ورنالاستىرۋ ماسەلەسىن پىسىقتايمىز. ال سىزدەر جاعىنان بولاشاق كاسىپورىننىڭ ەگجەي-تەگجەيلى جوباسىن كۇتەمىز. ارينە، ءبىز ءۇشىن ينۆەستيسيا، بيۋدجەتكە تۇسەتىن سالىق تۇسىمدەرى ماڭىزدى، ءبىراق ەڭ باستىسى – جەرگىلىكتى تۇرعىنداردى جۇمىسقا ورنالاستىرۋ، ولارعا لايىقتى جالاقى تولەۋ. جەتىسۋ وبلىسى مەن قحر-نىڭ گەوگرافيالىق جاعىنان قولايلى ورنالاسۋى بىرلەسكەن جوبالاردى ىسكە اسىرۋعا كەڭ مۇمكىندىك بەرەدى. ءبىز ينۆەستورلارعا زاڭدىق نەگىزدە قاجەتتى قولداۋ كورسەتەمىز"، - دەپ ءسوزىن تۇيىندەدى ءوڭىر باسشىسى ب. يسابايەۆ.

اتاپ وتسەك، جەتىسۋ وبلىسىندا قىتايدان كەلگەن سەرىكتەستەردىڭ قاتىسۋىمەن ءونىم وڭدەۋ، بالامالى ەنەرگەتيكا جانە لوگيستيكا سالاسىندا جالپى سوماسى 80 ملرد. تەڭگەدەن استام سوماعا 4 ينۆەستيسيالىق جوبا ىسكە اسىرىلعان.