اباي وبلىسىنىڭ اكىمى بەرىك ءۋاليدىڭ توراعالىعىمەن كەڭەيتىلگەن اپپاراتتىق جينالىس ءوتتى. وتىرىستا پايدالانىلماي جاتقان جەرلەردى قايتارۋ جانە بيۋدجەت قاراجاتىن ءتيىمدى يگەرۋ ماسەلەلەرى دە قارالدى،- دەپ حابارلايدى Dalanews.kz
وڭىردە 2022 جىلى پايدالانىلمايتىن جەرلەردى قايتارۋ بويىنشا ۆەدومستۆوارالىق كىشى توپ قۇرىلعان. كوميسسيا جۇمىسىنىڭ ناتيجەسىندە 512،8 مىڭ گەكتار جەر مەملەكەتتىك مەنشىككە قايتارىلعان.
وبلىستىق قالا قۇرىلىسى جانە جەر قاتىناستارى باسقارماسىنىڭ مالىمەتىنشە، بيىلعى جىلدىڭ سوڭىنا دەيىن 170 مىڭ گەكتار پايدانىلمايتىن اۋىل شارۋاشىلىعى جەرلەرىن قايتارۋ جوسپارلانعان. قازىرگى تاڭدا 51،5 مىڭ گەكتارى قايتارىلعان. بۇل جۇمىس بورودۋليحا، جارما، ماقانشى اۋداندارىندا باياۋ جۇرگىزىلۋدە.
وبلىس اكىمى اۋدان اكىمدەرىنە پايدالانىلمايتىن جەرلەردى قايتارۋ بويىنشا جۇمىس قارقىنىن كۇشەيتۋدى تاپسىردى.
«اۋدان اكىمدەرى اۋىل حالقىن جايىلىمدىق جەرمەن قامتاماسىز ەتۋ جۇمىسىن قاتاڭ باقىلاۋدا ۇستاڭىزدار. مەملەكەت مەنشىگىنە قايتارىلعان جەرلەردى قايتادان ەكونوميكالىق اينالىمعا ەنگىزۋ ءتارتىبى زاڭ تالابى اياسىندا جۇزەگە اسىرىلۋى قاجەت. بۇل – مەملەكەت باسشىسىنىڭ نازارىنداعى ماسەلە»،- دەدى وبلىس اكىمى.
جيىندا كۇن تارتىبىندەگى ءۇشىنشى ماسەلە بيۋدجەت قاراجاتىن يگەرۋ بويىنشا قارجى باسقارماسىنىڭ باسشىسى گۇلفايرۋس سەرىكبولوۆا باياندادى. ايماق باسشىسى وبلىستىق بيۋدجەتتىك باعدارلامالار اكىمشىلەرى، قالالار جانە اۋدانداردىڭ اكىمدەرىنە بيۋدجەت قاراجاتىن تولىق ءارى ۋاقتىلى يگەرۋ جونىندە ءتيىستى شارالار قابىلداۋدى جۇكتەدى.
