اباي وبلىسىنىڭ اكىمى بەرىك ءۋالي سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆپەن كەزدەستى، - دەپ حابارلايدى Dalanews.kz
سالالىق باسقارما باسشىسى، وڭىردەگى سۋ شارۋاشىلىعى قۇرىلىمدارىنىڭ وكىلدەرى قاتىسقان جيىندا ايماقتاعى سۋارمالى جەرلەردىڭ كولەمىن ارتتىرۋ، جاڭا سۋ قويمالارىن سالۋ جانە سۋ ينفراقۇرىلىمىن جاڭعىرتۋ ماسەلەلەرى تالقىلاندى.
2024-2028 جىلدار ارالىعىندا وبلىستىڭ ءۇرجار، ماقانشى، اقسۋات، كوكپەكتى اۋداندارىندا سۋ قويمالارىن سالۋ جوسپارلانعان. جوبا ىسكە اسقان جاعدايدا سۋارمالى جەرلەر ورتا ەسەپپەن 100 مىڭ گەكتارعا دەيىن ۇلعايادى. بۇل وڭىردەگى اگروسەكتوردىڭ دامۋىنا، ءونىم كولەمىنىڭ ارتۋىنا جانە جەرگىلىكتى تۇرعىنداردى جۇمىسپەن قامتۋعا مۇمكىندىك بەرەدى.
سۋ رەسۋرستارى جانە يرريگاسيا ءمينيسترى كەزدەسۋدە جوعارىدا اتالعان سۋ قويمالارىن يسلام دامۋ بانكى ارقىلى قارجىلاندىرۋعا مۇمكىندىك بار ەكەنىن جەتكىزدى.
«سىزدەردىڭ تاراپتارىڭىزدان جوبالىق-سمەتالىق قۇجاتتار ازىرلەنسە، جوبالاردى باستاۋعا بولادى. بۇل سۋ قويمالارىن سالۋ قازاقستان رەسپۋبليكاسىنىڭ سۋ سالاسىن دامىتۋدىڭ 2028 جىلعا دەيىنگى كەشەندى جوسپارىنا ەنگەن. جاڭا سۋ قويمالارىنىڭ قۇرىلىسى حالىقتىڭ ءال-اۋقاتىن ارتتىرىپ، ءوڭىردىڭ ەكونوميكاسىن دامىتۋعا ۇلەس قوسادى، جەرگىلىكتى شارۋالاردى سۋمەن تۇراقتى تۇردە قامتاماسىز ەتۋگە مۇمكىندىك بەرەدى»، - دەدى نۇرجان نۇرجىگىتوۆ.
وبلىس اكىمى سۋ قويمالارىن سالۋ ءوڭىر تۇرعىندارى ءۇشىن وزەكتى ماسەلە ەكەنىن اتاپ ءوتتى.
«ءبىزدىڭ وبلىس اۋىل شارۋاشىلىعىنا بەيىم. جوعارىدا اتالعان جوسپارداعى سۋ قويمالارى سالىنسا ايماقتىڭ اۋىل شارۋاشىلىعىنا تىڭ سەرپىن بەرىپ، سۋارمالى جەرلەردىڭ كولەمىن ۇلعايتۋعا مۇمكىندىك تۋادى. وبلىس شارۋالارى بۇل ماسەلەنى ءجيى كوتەرەدى. سوندىقتان سۋ رەسۋرستارى جانە يرريگاسيا مينيسترلىگىمەن بىرلەسە جۇمىس ىستەۋگە دايىنبىز»، - دەدى ايماق باسشىسى.
