كەشە كەشكى 21:50 شاماسىندا KC7326 رەيسىمەن شىمكەنتتەن استاناعا ۇشىپ كەلگەن بەلگىلى تەلەجۇرگىزۋشى ءلايلا سۇلتان قىزى Flyarystan اۋەكومپانياسىنىڭ ۇستىنەن ارىز جازدى، دەپ حابارلايدى Dalanews.kz.
ايتۋىنشا، بورتتىڭ ىشىندە كەلەڭسىز جاعداي ورىن العان.
"ۇشاقتىڭ ەسىگى اشىلماي، تۇرىپ كەتكەن جانىمداعى جولاۋشىنىڭ ابايسىزدىعىنان بەتىمە ۇستىڭگى سورەدە تۇرعان اۋىر (قاتتى) زات، وتىرعان ماعان قۇلاپ، كوزىمنىڭ تۇسىن جىرىپ، قاباعىم جارىلدى. بۇل @flyarystan اۋەكومپانياسى قاۋىپسىزدىك شاراسىن ساقتاماعاندىقتان ورىن العان جاعداي. بوردسەرىكتەر مەن اۋەكومپانيانىڭ العاشقى كومەككە دايىن ەمەس بولعانىنا قاپا بولدىم! نە اپتەچكا، نە مۇز، نە سۋىق زات، نە قان توقتاتىن، نە سالفەتكا جوق.
مەنىڭشە، ورنىمدا بالا، قارت ادام وتىرىپ، باسى جارىلسا، قاتتى جارالانسا، ميى شايقالسا، كوپ قان كەتسە جاعداي قيىن بولار ەدى. جاۋاپسىزدىق! ءار بورتسەرىك جولاۋشى مىنىپ-تۇسكەنشە ادام دەنساۋلىعىنا جاۋاپتى، العاشقى كومەك كورسەتۋگە مىندەتتى!"، - دەدى ول.
ەسكە سالايىق، بۇعان دەيىن جولاۋشىلار قۇقىعىن بۇزعانى ءۇشىن FlyArystan اۋە كومپانياسى جاۋاپكەرشىلىككە تارتىلعان ەدى.
ازاماتتىق اۆياسيا كوميتەتى الماتى – استانا باعىتى بويىنشا رەيس كەشىكتىرىلگەن كەزدە جولاۋشىلارعا قاجەت قىزمەتتى ۇسىنباۋىنا بايلانىستى "FlyArystan" اۋەكومپانياسىنا شارا قابىلدادى.
ناقتىراق ايتساق، جولاۋشىلار قوناقۇيگە ورنالاستىرىلماعان جانە ولاردى اۋەجايدان قوناق ۇيگە دەيىن جانە كەرى قاراي ترانسفەر ۇيىمداستىرىلماعان. اكىمشىلىك كودەكستىڭ 567-بابىنىڭ 2-بولىگى بويىنشا اكىمشىلىك قۇقىق بۇزۋشىلىق تۋرالى حاتتاما جاسالىپ، اۆياكومپانياعا 1 000 اەك (3 692 000 تەڭگە) مولشەرىندە ايىپپۇل سالىندى.
"ق ر كم ازاماتتىق اۆياسيا كوميتەتى رەيستەردىڭ كەشىگۋى كەزىندە قىزمەتتەردى تيىسىنشە ۇسىنۋ بولىگىندە قازاقستان رەسپۋبليكاسىنىڭ قولدانىستاعى زاڭناماسىنىڭ تالاپتارىن بۇزعانى ءۇشىن وتاندىق جانە شەتەلدىك اۆياكومپانيالاردى جاۋاپكەرشىلىككە تارتۋ جونىندەگى جۇمىستى جالعاستىرۋدا"، – دەلىنگەن كوميتەت حابارلاماسىندا.
