بايدىبەك اۋدانىندا جەدەل-ىزدەستىرۋ ءىس-شارالارى بارىسىندا پوليسيا قىزمەتكەرلەرى مال ۇرلىعىنا جانە زاڭسىز قارۋ ساقتاۋعا كۇدىكتى ەكى اعايىندىنى ۇستادى، دەپ حابارلايدى Dalanews.kz.
تۇركىستان وبلىسى پوليسيا دەپارتامەنتى مالىمەتىنشە، كۇدىكتىلەر اۋدان اۋماعىنداعى اۋىلداردىڭ بىرىنەن ءۇش باس سيىردى ۇرلاپ، ولاردى كورشىلەس اۋداندا ساتىپ ۇلگەرگەن. قىلمىس درون كومەگىمەن تىركەلىپ، بۇل پوليسەيلەرگە كۇدىكتىلەردىڭ ىزىنە جەدەل تۇسۋگە مۇمكىندىك بەرگەن.
كۇدىكتىلەر سول كۇنى تۇرعىلىقتى مەكەنجايلارى بويىنشا ۇستالدى. ءتىنتۋ بارىسىندا التى باس مال، اڭشىلىق مىلتىق جانە وزگە دە ايعاقتى زاتتار تاركىلەندى. سونىمەن قاتار ۇرلانعان مالدى ساتىپ العان ازامات تا انىقتالدى. ول ورداباسى اۋدانىنىڭ تۇرعىنى بولىپ شىققان.
قازىرگى ۋاقىتتا اتالعان دەرەك بويىنشا سوتقا دەيىنگى تەرگەۋ جۇرگىزىلىپ جاتىر. كۇدىكتىلەردىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە.
