"تۇنەرگەن ساتتەن كەيىن ءاردايىم كۇن شىعادى! مەن ءاردايىم بىلەتىنمىن! كۇندى بۇلتتارمەن، نايزاعايمەن، جاڭبىرمەن جابۋعا بولادى، ءبىراق شىن مانىندە جارقىراسا، شۋاعى مىندەتتى تۇردە سىرتقا شىعادى! دۇعا تىلەپ، قولداۋ بىلدىرگەندەرىڭىز ءۇشىن، مەيىرىمدەرىڭىز ءۇشىن جانە تۇسىنىستىكپەن قاراعاندارىڭىز ءۇشىن سىزدەرگە العىس ايتامىز! مەنىڭ بار ءومىرىم، بار ءۇمىتىم، بار ارمانىم تەك جاقسىلىقپەن، مەيىرىمدىلىكپەن، جارقىن ساتتەرمەن بايلانىستى بولادى! سىزدەردىڭ دۇعا-تىلەكتەرىڭىزدىڭ ارقاسىندا شىعار، مەن ءالى دە ءومىر سۇرگىم كەلەدى، سۇيگىم كەلەدى!"، - دەپ جازدى بايان ەسەنتايەۆا Instagram جەلىسىندەگى پاراقشاسىندا.
سوڭعى رەت ماماندار بايان ەسەنتايەۆانىڭ جاعدايى جاقسارىپ كەلە جاتقانىن حابارلاعان بولاتىن. "ەمدەلۋشى ءالى دە جانساقتاۋ بولىمىندە جاتىر. جاعدايى جاقسارىپ كەلەدى. ورتاشا اۋىر دەپ ايتۋعا بولادى"، - دەدى اۋرۋحانانىڭ ەمدەۋ ءىسى جونىندەگى ديرەكتورىنىڭ ورىنباسارى ەربول سارسەنبايەۆ.
ەسكە سالايىق، بەلگىلى پروديۋسەر بايان ەسەنتايەۆا تالعار اۋداندىق ورتالىق اۋرۋحاناسىنا 10 ماۋسىم كۇنى جەتكىزىلگەن بولاتىن. بولجام بويىنشا، ونىڭ كۇيەۋى - باقىتبەك ەسەنتايەۆ ەڭبەكشى اۋدانىنداعى قۇلجا تاس جولىنىڭ بويىندا ونى سوققىعا جىعىپ، پىشاق جاراقاتىن العان. ەر ادام ەكى ايعا قاماۋعا الىندى.
دەرەككوز: kaz.tengrinews.kz
