ورال قالاسىنىڭ ٸرگەسٸندەگٸ "بٸرٸنشٸ داچا" اتالاتىن ساياجايدان ٷي سالىپ, وسى كەزگە دەيٸن الاڭسىز تۇرعان ايدوس جۇماعاليەۆتٸڭ وتباسى قارعىن سۋ كەلگەندە باسپاناسىن تاستاپ, ەۆاكۋاتسييالىق پۋنكتكە كٶشۋگە مەجبٷر بولعان.
وتباسى قيىن جاعدايعا تاپ بولعان كەزدە وتاناسى راۋشاننىڭ اي-كٷنٸ جەتٸپ قالعان ەدٸ. ۋاقىتشا ورنالاسۋ پۋنكتٸنە كەلگەن اياعى اۋىر كەلٸنشەكتٸ سول جەردەگٸ دەرٸگەرلەر مەن تۇرعىندار باقىلاۋىنا العان. قانشا جەردەن جاعداي جاسالسا دا كٷتٸمدٸ قاجەت ەتەتٸن راۋشاننىڭ جاعدايى ەشكٸمدٸ بەي-جاي قالدىرمادى. دەرٸگەرلەر ەرەكشە كٷتٸپ, ورال قالالىق كٶپبەيٸندٸ اۋرۋحاناعا جەتكٸزگەن.
اي كٷنٸ جەتٸپ, راۋشان نازىم ەسٸمدٸ قىز بوساندى. جۇماعاليەۆتەر وتباسىنىڭ جاعدايىن ەستٸگەن باتىس قازاقستان وبلىستىق مەسليحات دەپۋتاتى ازامات بيسەنوۆ راۋشانعا حابارلاسىپ, ەكٸ ايعا پەتەر جالداعانىن ايتقان.
– جاعدايىمدى ەستٸگەن دەپۋتات حابارلاسىپ: "سٸز كٷتٸنۋٸڭٸز كەرەك. بالا باقىلاۋدا بولعانى جاقسى. سوندىقتان وتباسىڭىز ٷشٸن ەكٸ ايعا پەتەر جالدادىم",-دەدٸ. ەل ٸشٸندە نەشە تٷرلٸ ەڭگٸمە جٷرٸپ جاتىر. بٸراق ەلٸمٸز ەۆاكۋاتسييالانعان تۇرعىندارعا بارىنشا جاعداي جاساپ جاتىر, –دەيدٸ راۋشان تابىنوۆا.
ايدوس پەن راۋشاننىڭ وتباسىندا وسىعان دەيٸن شىرىن, نۇردوس, ٸڭكەر دەگەن بالدار بولسا, ەندٸ نازىم ەسٸمدٸ قىز كەلدٸ.
– وتباسىمىزدىڭ جاعدايىن جاساپ, قولداۋىن بٸلدٸرگەن جاندارعا العىسىمىز شەكسٸز. كٶپ ۇزاماي ٷيٸمٸزگە ورالامىز دەگەن ويدامىن, – دەيدٸ راۋشان.
گۋمانيتارلىق كٶمەك جيناۋ باستالعالى ەشكٸم شەت قالىپ جاتقان جوق. ەسٸرەسە, مەسليحات دەپۋتتارى بەلسەندٸ. وسى كەزگە دەيٸن وبلىستىق مەسليحات دەپۋتاتتارى 12 پەتەرگە مٷمكٸندٸگٸ شەكتەۋلٸ 1 توپ مٷگەدەكتەرٸ مەن كٶپبالالى جٷكتٸ كەلٸنشەكتەردٸ ۋاقىتشا پەتەرگە ورنالاستىردى.
جالپى, وسى كەزگە دەيٸن حالىق قالاۋلىلارى 7 ميلليوننان استام تەڭگەگە كٶمەك كٶرسەتكەن.
