13 ناۋرىزدا ق ر پرەمەر-مينيسترى ولجاس بەكتەنوۆتىڭ توراعالىعىمەن وتكەن سۋ تاسقىنىنا قارسى ءىس-شارالاردى ۇيلەستىرۋ جونىندەگى رەسپۋبليكالىق شتاب وتىرىسىندا بقو اكىمى ناريمان تورەعالي ۇلى ىقتيمال سۋ تاسقىنىن بولدىرماۋ ءۇشىن قابىلدانىپ جاتقان شارالار تۋرالى ەسەپ بەردى، - دەپ حابارلايدى Dalanews.kz

«قازگيدرومەت» دەرەكتەرىنە سايكەس، وبلىستاعى وزەندەردەگى سۋ دەڭگەيى ءقاۋىپتى مەجەدەن تومەن بولادى دەپ بولجانۋدا. دەگەنمەن، وڭىرلىك بيلىك احۋالدى باقىلاۋ ءۇشىن قوسىمشا شارالار قابىلدادى. وبلىستاعى 22 گيدروبەكەتكە قوسىمشا 7 جاڭا باقىلاۋ بەكەتى ورناتىلدى. سونىمەن قاتار، جايىق، شاعان جانە دەركول وزەندەرىندە ءۇش اۆتوماتتاندىرىلعان باقىلاۋ جۇيەسى ىسكە قوسىلماق، ولار ناۋرىز ايىنىڭ سوڭىنا دەيىن تولىق جۇمىس ىستەيدى. بۇل جۇيەلەر سۋ دەڭگەيىن جەدەل قاداعالاپ، ىقتيمال قاۋىپتەرگە جەدەل ارەكەت ەتۋگە مۇمكىندىك بەرەدى.

وبلىس اكىمى ءوڭىردىڭ ازاماتتىق قورعانىس جۇيەسى جوعارى دايىندىق رەجيمىنە كوشىرىلگەنىن اتاپ ءوتتى.

«ۇزىندىعى 143 شاقىرىم بولاتىن 81 قورعانىس بوگەتى سالىندى، 9 شاقىرىم سۋ بۇرۋ ارنالارى، 93 شاقىرىم ارىق قازىلدى، ەلدى مەكەندەرگە 582 مەترلىك سۋ وتكىزۋ قۇبىرلارى ورناتىلدى، 74 شاقىرىم ماگيسترالدىق كانالدار تازارتىلدى. وبلىستاعى بارلىق سۋ قويمالارى ترانزيتتىك رەجيمدە جۇمىس ىستەپ تۇر»، – دەپ باياندادى ناريمان تورەعالي ۇلى.

بولجامدى توتەنشە جاعدايلاردىڭ الدىن الۋ ماقساتىندا وبلىستا ەداۋىر كولەمدە ماتەريالدىق-تەحنيكالىق رەسۋرستار قورى جاساقتالدى. تاۋلىك بويى 1،8 مىڭ ارنايى تەحنيكا، 123 ءجۇزۋ قۇرالى، 455 موتوپومپا جانە 4 مىڭنان استام قىزمەتكەر جۇمىلدىرىلعان. سونىمەن قاتار، 12 مىڭ توننادان استام ينەرتتى ماتەريال، 413 مىڭ قاپ، 423 توننا جانار-جاعارماي قورى دايىندالدى. 95 مىڭنان استام قۇم سالىنعان قاپ ازىرلەنگەن.

بۇدان بولەك، 32 مىڭ ادامدى ورنالاستىرۋعا ەسەپتەلگەن 317 ۋاقىتشا ەۆاكۋاسيالىق بەكەتتەر دايىندالدى. سونداي-اق، اۋىل شارۋاشىلىعى جانۋارلارىن ءقاۋىپسىز ايماقتارعا كوشىرۋ ءۇشىن 195 ارنايى ورىندار بەلگىلەندى.

ايتا كەتەيىك، وبلىستىق سۋ تاسقىنىنا قارسى شتاب ءوز جۇمىسىن 10 ناۋرىزدا باستاعان. قازىرگى ۋاقىتتا قىس ماۋسىمىنىڭ سالدارىن جويۋ جانە سۋ تاسقىنىنا دايىندىق جۇمىستارى قارقىندى جۇرگىزىلۋدە. 916 مىڭ تەكشە مەتر قار شىعارىلىپ، 49،3 مىڭ تەكشە مەتر ەرىگەن سۋ سورىلدى، 27 شاقىرىم سۋ بۇرۋ ارنالارى، 62 شاقىرىم ارىقتار جانە 1 200-دەن استام سۋ وتكىزۋ قۇبىرلارى تازارتىلدى. سونداي-اق، 1،5 مىڭ شارشى مەتر جەر قارايتىلدى.