كەشە پرەزيدەنت قاسىم-جومارت توقايەۆ رەسپۋبليكالىق شتاب وتىرىسىندا ەلدەگى توتەنشە جاعداي رەجيمىنىڭ ءساۋىر ايىنىڭ اياعىنا دەيىن سوزىلعانىن ايتىپ، سوعان وراي وڭىرلەرگە ءبىرقاتار ءتيىستى تاپسىرمالار بەرگەن ەدى. وسىعان بايلانىستى الماتى وبلىسىنىڭ اكىمى اماندىق باتالوۆ بۇگىن جيىن وتكىزىپ، تاپسىرمالاردى ورىنداۋداعى مىندەتتىلىكتەردى تالقىلادى.
الدىمەن وبلىس اكىمى ءوز ورىنباسارلارىنا ءسوز بەردى. ولاردىڭ ءارقايسىسى ءوزى جەتەكشىلىك ەتەتىن سالالار بويىنشا قىسقاشا باياندادى. ماسەلەن، ءبىرىنشى ورىنباسارى ل. تۇرلاشوۆ الماتى وبلىسى تاۋلى ءوڭىر بولعاندىقتان، وعان قوسا الداعى كۇندەردىڭ جاۋىن-شاشىندى بولادى دەگەن بولجامىنا قاراي سۋ تاسقىنىنىڭ الدىن الۋ شارالارىن باقىلاۋدا ۇستاۋ، «جۇمىسپەن قامتۋ جول كارتاسى» بويىنشا جۇرگىزىلەتىن قۇرىلىس جۇمىستارىنىڭ دايىندىعى، بولىنگەن قارجىنى يگەرۋ ماسەلەلەرى تۋرالى ايتتى.
ءوز كەزەگىندە وبلىس اكىمىنىڭ ورىنباسارى س. بەسكەمپىروۆ كوكتەمگى ەگىس جۇمىستارىنا بەرىلەتىن نەسيەلەردى الۋعا قۇجاتتار دايىنداۋ، قانت قىزىلشاسى تۇقىمىن اۋدان، قالالاردىڭ الۋ بەلسەندىلىگى جايلى تىلگە تيەك ەتتى.
ماسەلەن، اقسۋ، سارقان اۋداندارى، قاپشاعاي قالاسىنىڭ شارۋا قوجالىقتارى دايىن تۇقىمدى الۋعا ءالى اسىعار ەمەس. بۇل رەتتە وبلىس اكىمى اتالعان اۋدان، قالالاردىڭ اكىمدەرىنەن جاۋاپ الىپ، بيىلعى جىلى وڭىردە سەبىلەدى دەپ جوسپارلانعان 16 مىڭ گەكتاردىڭ 1 گەكتارى دا كەم سەبىلمەۋى كەرەكتىگىن اكىمدەرگە قاتاڭ ەسكەرتتى.
وبلىس اكىمىنىڭ ورىنباسارى س. تۇردالييەۆ ازىق-تۇلىك قاۋىپسىزدىگىن قامتاماسىز ەتۋ مەن باعانى تۇراقتاندىرۋ ماقساتىندا اتقارىلىپ جاتقان ىستەرگە توقتالدى.
قازىرگى كەزدە باعانى تۇراقتاندىرۋ ءۇشىن كەلىسىمشارت جاساساتىن ساۋدا سالاسىنىڭ 29 كاسىپورىنى بەلگىلەنگەن. سونىڭ ىشىندە «سابىرجان» كومپانياسىمەن كەلىسىمشارت جاسالىپ ۇلگەرگەن. وسى ورايدا اماندىق باتالوۆ اۋدان، قالا اكىمدەرىنە:
– كەلىسىمشارتقا وتىرعان ساۋدا ۇيلەرىنە نۇروتاندىقتارمەن، قوعامدىق ۇيىمدارمەن بىرگە بارىپ كورىڭدەر، قانداي تاۋارلار بار، اسسورتيمەنت جەتكىلىكتى مە، قانداي باعامەن ساتىلىپ جاتىر، سونىڭ ءبارىن باقىلاپ ءبىلىپ وتىرۋلارىڭ كەرەك. وسىنداي ارنايى شارالار قابىلدانىپ جاتقانى تۋرالى حالىققا ايتىپ، ءتۇسىندىرىپ، جەتكىزىڭدەر. ءبىر اپتادان سوڭ ازىق-تۇلىك باعاسىن ىرىقتاندىرۋ تۋرالى ماعان جەكە-جەكە ەسەپ بەرەسىڭدەر، – دەدى.
سول سياقتى وبلىستاعى شاعىن جانە ورتا بيزنەس نىساندارىندا جۇمىس ىستەگەن ازاماتتاردى «جۇمىسپەن قامتۋ جول كارتاسى» اياسىندا جۇمىسقا تارتۋ ماسەلەسى دە پىسىقتالدى.
الماتى وبلىسى اكىمىنىڭ ورىنباسارى ب.بايجۇمانوۆ مەديسينا ماماندارىنا ۇستەماقى مەن سىياقى بەرۋ، ولاردى قاجەتتى جەكە قورعانۋ قۇرالدارىمەن قامتۋ، كارانتيندەگى «اسىل ارمان» تۇرعىن ءۇي كەشەنىنىڭ جاعدايى، بالالاردى قاشىقتان وقىتۋدىڭ جاي-كۇيى سياقتى ءبىرقاتار ماسەلەلەردى باياندادى.
وعان قوسا قاراساي اۋدانىنىڭ اكىمى جانداربەك دالابايەۆ «اسىل ارمان» تك-دا وبلىستىق اكىمدىكتىڭ كومەگىمەن 983 وتباسىنا، اۋدان ءوز تاراپىنان قوسىمشا 385 وتباسىنا كومەك كورسەتىپ، قاجەتتىلىكتەرمەن قامتاماسىز ەتكەنىن جەتكىزدى.
جيىن سوڭىندا وبلىس اكىمى توتەنشە جاعداي رەجيمىنىڭ ءساۋىر ايىنىڭ سوڭىنا دەيىن سوزىلۋىنا بايلانىستى بارلىق بلوكپوستتار قازىرگىدەي كۇشەيتىلگەن رەجيمدە جۇمىسىن جالعاستىرۋى تيىستىگىن ايتتى.
– اسىرەسە جامبىل وبلىسىمەن شەكتەسەتىن اۋماقتاردا قاتاڭ ساقتىق قاجەت. ىندەتپەن كۇرەس شارالارىنا تارتىلعان بارلىق مامانداردىڭ جەكە قورعانۋ قۇرالدارىمەن تولىق كولەمدە ۇزدىكسىز قامتاماسىز ەتىلۋى قاتاڭ باقىلاۋعا الىنسىن. ارتىق ءجۇرىس-تۇرىستى، كوشەگە شىعۋدى شەكتەۋ، دەزينفەكسيالىق شارالار ودان ءارى جالعاسادى. ەگىس القاپتارىنداعى كوكتەمگى جۇمىستار توقتامايدى. «جۇمىسپەن قامتۋ جول كارتاسىنىڭ» جوبالارىن جۇزەگە اسىراتىن مەردىگەر كومپانيالاردىڭ جاۋاپتى، ساپالى بولۋىنا نازار اۋدارىپ، ولاردىڭ جۇمىسىن كەستە بويىنشا قاتاڭ باقىلاۋدا ۇستاۋىمىز كەرەك. ەڭ باستىسى – كارتاعا ەنگىزىلگەن جوبالاردى جۇزەگە اسىرۋ، سول ارقىلى جاڭا جۇمىس ورىندارىن اشۋ، قارجىنى دەر كەزىندە يگەرۋ. ءار اۋدان، قالا اكىمدەرى، سالا جەتەكشىلەرىنىڭ پرەزيدەنت جۇكتەگەن مىندەتتەردى باسشىلىققا الىپ جۇمىس ىستەۋىن قاتاڭ تاپسىرامىن. –ا. باتالوۆ.
الماتى وبلىسى اكىمىنىڭ باسپا ءسوز قىزمەتى
