باس پروكۋراتۋرا 2022 جىلعى قاڭتارداعى وقيعالارعا بايلانىستى قىلمىستىق ىستەردى ءالى دە تەرگەپ جاتىر، - دەپ حابارلايدى Dalanews.kz.
29 ساۋىردە اۋىر زارداپتارعا اكەپ سوققان بيلىك پەن لاۋازىمدىق وكىلەتتىكتەردى اسىرا پايدالانعانى ءۇشىن (قىلمىستىق كودەكستىڭ 362-بابى 4-بولىگى) قىلمىستىق ءىس جۇرگىزۋ كودەكسىنىڭ 128-بابى تارتىبىندە ىشكى ىستەر ەكس-مينيسترى ەرلان تۇرعىمبايەۆ ۇستالعان.
"قىلمىستىق ىستە مەملەكەتتىك قۇپيا مالىمەتتەر بولۋىنا بايلانىستى سوتالدى تەرگەپ-تەكسەرۋدىڭ باسقا دەرەكتەرى جاريالانبايدى"، - دەپ جازىلعان حابارلامادا.
ايتا كەتەيىك، بۇعان دەيىن دە بۇقارالىق اقپارات قۇرالدارىندا بۇرىنعى ىشكى ىستەر ءمينيسترى ەرلان تۇرعىمبايەۆتىڭ ۇستىنەن قىلمىستىق ءىس قوزعالعانى تۋرالى اقپارات تارادى.
دەرەكتەرگە سۇيەنسەك، وعان قاتىستى 361-باپتىڭ 1ء-بولىمى ("لاۋازىمدىق وكىلەتتىكتەردى تەرىس پايدالانۋ") بويىنشا ءىس قوزعالعان، ياعني قاڭتار وقيعاسى كەزىندە قىزمەتتىك وكىلەتىن اسىرا پايدالاندى دەپ ايىپتالىپ وتىر ەكەن.
سونىمەن قاتار، دەرەكتەردە تەرگەۋ نىسانىندا بۇرىنعى ىشكى ىستەر مينيسترىنەن بولەك تالدىقورعان پوليسياسىنىڭ بۇرىنعى باستىعى اسقار نۇرساپا، قاراساي اۋدانىنىڭ بۇرىنعى پوليسيا باستىعى بولات توتىبايەۆ جانە باسقالارى بار ەكەنى ايتىلدى.
ەرلان تۇرعىمبايەۆ 2012 جىلدان بەرى ىشكى ىستەر ءمينيسترىنىڭ ورىنباسارى، 2019 جىلدان بەرى ىشكى ىستەر ءمينيسترى قىزمەتتەرىن اتقاردى.
ال 2022 جىلى ونىڭ قىزمەتتەن كەتكەنى بەلگىلى بولدى.
