دەپۋتاتتىڭ ايتۋىنشا، ول بۇل ءسوزدى ايتقاندا وڭىرلەردە جاعداي جاساۋ تۋرالى، ياعني، اۋىلدان كەلەتىن جاستارعا قالا جاستارىمەن بىردەي جاعداي جاساۋ جايلى ويدى جەتكىزگىسى كەلگەن.
"تىيىم سالدى دەگەن ءسوز - باس دەسە، قۇلاق دەۋ. مەن تىيىم سالۋ كەرەك (قالاعا اۋىل جاستارىنىڭ كەلۋىنە - اۆتور.) دەپ ايتقانىم جوق، بۇل ءار ادامنىڭ كونستيتۋسيالىق قۇقىعى. مادەنيەت ماسەلەلەرىن شەشۋ، جاقسى اقشا بەرەتىن جۇمىس تاۋىپ بەرۋ، جاقسى ينفراقۇرىلىم جاساۋ"
- دەدى بوجكو.
سونداي-اق، ول "نۇرلى جەر" باعدارلاماسىنا بولىنگەن قاراجاتتىڭ ءبىر بولىگىن اۋىلداردا تۇرعىن ءۇي جاعدايلارىن جاساۋعا باعىتتالۋى جايلى ايتقانىن ءتۇسىندىردى. دەپۋتاتتىڭ ايتۋىنشا، ول وسى كۇنگە دەيىن ينتەرنەتتە وزىنە قاتىستى ايتىلعان ءتۇرلى ءتىل تيگىزەتىن سوزدەردى وقىعان.
"بىرەۋلەر ءتىپتى دورەكى سوزدەر جازىپ، مۇنى شوۆينيزم دەپ ايىپتاپ جاتتى. مەنىڭشە، ول ادامدار وزدەرىن تانىمال ەتۋ ماقساتىندا مەنىڭ سوتقا دەيىن بارعانىمدى قالايدى. ال مەن سوتقا ارىزدانبايمىن، مەن ولاردىڭ بۇل ءادىسىن بىلەمىن. قازىرگى ۋاقىتتا اقپاراتتاندىرۋ تۋرالى زاڭدى قاراپ جاتىرمىز. مەنىڭ ويىمشا، دورەكى پىكىرلەر جازاتىن جانە ينتەرنەتتە وزدەرىن قالاي بولسا سولاي ۇستايتىن ازاماتتارعا وسى ارەكەتىنە جول بەرمەيتىن ۋاقىت كەلىپ قالدى"، - دەدى ۆلاديمير بوجكو.
ەسكە سالا كەتەيىك، وسىعان دەيىن دەپۋتات "ابۋ-دابي پلازادا" بولعان توبەلەستەن كەيىن اۋىلدان كەلەتىن جاستارعا قاتىستى پىكىر بىلدىرگەن بولاتىن.
ايتۋىنشا، استانادا بولعان توبەلەستەن كەيىن الەۋمەتتىك جەلىلەردە اۋىلداردان كەلگەن جاستاردىڭ ارانداتۋشىلىق ماندەگى سوزدەرى تارالىپ جاتىر.
"سونداي-اق، الەۋمەتتىك جەلىلەردە ويدان شىعارىلعان جانە شىندىققا جاناسپايتىن ارانداتۋشىلىق ماندەگى مالىمەتتەر تارالىپ جاتىر. ونداي پىكىرلەردىڭ باسىم بولىگى اۋىلداردان كەلگەن جاستاردان، وزدەرىنە لايىقتى اقشا بەرەتىن جۇمىس تابۋعا قينالىپ جۇرگەن جاستاردان كەلىپ جاتىر"، - دەگەن ەدى دەپۋتات.
