ۋكراينا پرەزيدەنتى ۆلاديمير زەلەنسكيي اقش-تىڭ جاھاندىق قاۋىپسىزدىكتى جالعىز ءوزى قامتاماسىز ەتە المايتىنىن مالىمدەپ، ەلدەر اراسىنداعى سەرىكتەستىكتىڭ ماڭىزىن اتاپ ءوتتى، دەپ حابارلايدى Dalanews.kz.
زەلەنسكييدىڭ ايتۋىنشا، قازىرگى زاماندا "قاشىقتىق" ۇعىمى بۇرىنعىداي كەدەرگى ەمەس. ول درون تەحنولوگيالارىنىڭ قارقىندى دامۋى قاۋىپ-قاتەردىڭ شەكاراسىن كەڭەيتىپ جاتقانىن جەتكىزدى.
"امەريكالىقتاردىڭ ءبىر نارسەنى تۇسىنگەنىن قالايمىن. ءبىز ولاردىڭ ەۋروپاداعى سەنىمدى وداقتاستارىنىڭ ءبىرىمىز"، – دەدى ۋكراينا پرەزيدەنتى.
ونىڭ سوزىنشە، الداعى جىلدارى دروندار مىڭداعان شاقىرىمعا ەركىن ۇشىپ، ءتىپتى ون مىڭداعان شاقىرىم قاشىقتاعى نىساندارعا جەتۋى مۇمكىن. سونىمەن قاتار رەاكتيۆتى قوزعالتقىشتاردىڭ دامۋى ولاردىڭ قۇنىن ارزانداتىپ، جاپپاي قولدانىلۋىنا جول اشادى.
زەلەنسكيي بولاشاقتا "دروندار توبى" پايدا بولىپ، بۇل ءقاۋىپتىڭ اۋقىمىن ودان ءارى ۇلعايتاتىنىن اتاپ ءوتتى.
ول اقش-تىڭ مۇنداي قاۋىپتەرگە جالعىز قارسى تۇرا المايتىنىن ايتىپ، حالىقارالىق ىنتىماقتاستىقتىڭ قاجەت ەكەنىن جەتكىزدى.
"سوندىقتان ءبىز امەريكالىقتارعا قاجەتپىز، ال بىزگە – امەريكا قۇراما شتاتتارى قاجەت"، – دەپ تۇيىندەدى ول.
