«AMANAT» پارتياسى فراكسياسىنىڭ ماجىلىستەگى وتىرىسىندا دەپۋتات باقىتجان بازاربەك كونستيتۋسيانىڭ تەك قۇقىقتىق نورمالار جيىنتىعى عانا ەمەس، ەلدىڭ ۇلتتىق بىرەگەيلىگىن جانە نەگىزگى قۇندىلىقتارىن كورسەتەتىن ماڭىزدى قۇجات ەكەنىن اتاپ ءوتتى، دەپ حابارلايدى Dalanews.kz.
«نەگىزگى زاڭ مەملەكەت قانداي پرينسيپتەردى ۇستاناتىنىن جانە قوعامعا، سونداي-اق شەتەلدىك سەرىكتەستەرگە ەلدىڭ باعىتىن كورسەتەدى»، - دەدى ول.
كونستيتۋسيا ادىلدىك، ادام قۇقىقتارى جانە قوعامدىق كەلىسىم يدەيالارىن جۇزەگە اسىرادى.
دەپۋتات كاسىبي پارلامەنت قالىپتاستىرۋعا ەرەكشە ءمان بەرىپ، ونى دەموكراتيالىق ينستيتۋتتاردى نىعايتۋدىڭ باستى قادامى دەپ باعالادى. ەندى بارلىق دەپۋتاتتار تەڭ جاعدايدا سايلانادى، تاعايىنداۋلار مەن «پاراشيۋتتىك» كانديداتتار بولمايدى. بۇل پروسەسس اشىق ءارى ءادىل بولۋمەن قاتار، دەپۋتاتتاردىڭ ازاماتتارعا جاۋاپكەرشىلىگىن ارتتىرادى.
باقىتجان بازاربەك كاسىبي پارلامەنت ۇكىمەتتىڭ قىزمەتىن ءتيىمدى باقىلاۋعا، قوعامنىڭ ناقتى قاجەتتىلىكتەرىن ەسكەرەتىن زاڭنامالىق باستامالاردى قالىپتاستىرۋعا جانە مەملەكەتتىك ينستيتۋتتارعا دەگەن سەنىمدى نىعايتۋعا مۇمكىندىك بەرەتىنىنە توقتالدى. سونىمەن قاتار، اشىق سايلاۋ مەن كانديداتتار اراسىنداعى باسەكەلەستىك پارلامەنتكە ەڭ بىلىكتى ءارى جاۋاپتى ادامداردىڭ كەلۋىن قامتاماسىز ەتەدى.
وسىلايشا، جاڭا كونستيتۋسيا مەن پارلامەنت رەفورمالارى قازىرگى زامانعى، ءادىل ءارى اشىق بيلىك جۇيەسىنىڭ بەرىك نەگىزىن قالىپتاستىرادى. بۇل جۇيەدە حالىق بيلىكتىڭ باستى كوزى بولىپ قالا بەرەدى جانە مەملەكەت ءۇشىن ماڭىزدى شەشىمدەرگە ناقتى ىقپال ەتە الادى.
