بۇگىن ءماجىلىستىڭ جالپى وتىرىسىندا «قازاقستاننىڭ كەيبىر زاڭنامالىق اكتىلەرىنە اقپاراتتىق قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ءبىرىنشى وقىلىمدا قارالدى.
دەپۋتات سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى مالىك ولجابەكوۆكە ماڭىزدى سۇراق قويدى. ءقازىر اقپاراتتىق قاۋىپسىزدىكتى كۇشەيتۋ جونىندەگى زاڭدى قاراپ وتىرمىز. 2016 جىلى جەرگە قاتىستى ۇلكەن ميتينگىلەر بولدى. سالدارىنان حالىق كوتەرىلدى. ونداعى ەڭ نەگىزگى ماسەلە جەر كاداسترىن اشۋعا بايلانىستى بولدى. ءاربىر جەردىڭ ارتىندا قانداي جەمقور شەنەۋنىك، پروكۋرور، اكىم، سۋديا جانە وسى جۇيەمەن اۋىز جالاسقان قانداي وليگارح تۇرعانىن حالىق ءبىلۋى كەرەك. وكىنىشكە قاراي، بۇل اقپارات اشىلمادى، - دەدى دەپۋتات.
ودان بولەك، دەپۋتات ماجىلىستە كوتەرىلگەن بىرنەشە ماسەلە ۇكىمەتتەن قولداۋ تاپپاعانىن ايتتى. «اكتيۆتەردى قايتارۋ تۋرالى» زاڭ جوباسىندا مەن بۇل ۇسىنىستى ەنگىزدىم. ارىپتەستەرىم ۇسىنىسىمدى قولداسا دا ۇكىمەتتىڭ كەسىرىنەن ول قابىلدانبادى. «جايىلىمدار تۋرالى» زاڭ جوباسىندا دا وسىنى ۇسىندىم. ونى ارىپتەستەرىم قولداپ، ۇكىمەت قايتا قولدامادى.
بىرىنشىدەن، زاڭ جوباسى («قازاقستاننىڭ كەيبىر زاڭنامالىق اكتىلەرىنە اقپاراتتىق قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى») جەر كاداسترىنداعى (مالىمەتتى) اشۋعا كومەكتەسە مە؟ ەرتەڭ جەر كاداسترى اشىلماي قالماي ما؟ ەكىنشىدەن، ورحۋس كونۆەنسياسىنا قوسىلدىق. ونىڭ اقپاراتتىق قولجەتىمدىلىگى. وعان قازاقستان راتيفيكاسيا جاسادى. الايدا جەر كاداسترى اشىلماي تۇر. بۇل زاڭدى ما؟، - دەدى باقىتجان بازاربەك.
سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى مالىك ولجابەكوۆ دەپۋتاتتىڭ ساۋالىنا جاۋاپ بەرۋگە تىرىسىپ، "مەملەكەت باسشىسىنىڭ تاپسىرماسىن ورىنداۋ اياسىندا ءبىز اشىقتىقتى قامتاماسىز ەتۋ ءۇشىن ارنايى جاريا كاداسترلىق كارتانى ىسكە قوستىق. ونىڭ نەگىزىندە جەر ۋچاسكەلەرى تۋرالى اقپاراتقا قول جەتكىزۋگە مۇمكىندىك ۇيىمداستىرىلادى. ءقازىر وسى جاريا كاداسترلىق كارتانىڭ نەگىزىندە جەر قۇقىقتىق جانە قالا قۇرىلىسى كاداسترلارىنىڭ دەرەكتەرى جاريالاندى. سونداي-اق جەر ۋچاسكەلەرىنىڭ مەنشىك يەلەرى تۋرالى دەرەكتەر جەر كودەكسىنە سايكەس مەملەكەتتىك جەر كاداسترىنىڭ اۆتوماتتاندىرىلعان اقپارات جۇيەسىنىڭ جەرگىلىكتى بازاسىنان ونى جيناپ، كوشىرىپ جاتىرمىز. وسى تەحنيكالىق جۇمىستار اياقتالدى. ەندى فۋنكسيونالدىق تەستىلەۋ جۇرگىزىلىپ جاتىر. وسى تەستىلەۋ بىتكەن سوڭ جاريا كاداسترلىق كارتاسىندا جاريالانادى. ونى قازاننىڭ اياعىنا دەيىن دەپ جوسپارلاپ وتىرمىز، – دەدى ۆيسە-مينيستر.
ءبىراق دەپۋتات باقىتجان بازاربەك ۆيسە-مينيستردىڭ جاۋابىنا قاناعاتتانعان جوق، ول «وتىرىك اڭگىمەدەن» شارشاعانىن اشىق ايتتى. قازاقتا «دومبىرام نە دەيدى، مەن دەيمىن» دەگەن ماقال بار. مەن سىزدەن جاريا كاداسترلىق كارتا تۋرالى سۇرامادىم. مەن سىزدەن «جەردىڭ يەسى كىم؟» دەپ سۇراپ تۇرمىن. جەردىڭ يەسى مەن ونىڭ ءاتى-جونى تۋرالى اقپارات اشىق بولۋعا ءتيىس. ورحۋس كونۆەنسياسىنا قوسىلدىق. كونۆەنسيانىڭ كۇشى كونستيتۋسيانىڭ 4-بابىنا سايكەس ۇلتتىق زاڭنامادان باسىم بولادى. وتىرىك اڭگىمەنى قاشان توقتاتاسىزدار؟ جەر كاداسترىن اشۋ كەرەك. حالىقتىڭ مۇڭى وسى. مۇنداي وتىرىك اڭگىمەنى پارلامەنت تورىندە ايتۋدى قويىڭىزدار. بولماسا، جۇمىستان كەتىڭىزدەر، – دەدى دەپۋتات.
